Repubblika tħabbar ġimagħtejn ta’ attivitajiet biex tfakkar disa’ snin mill-qtil ta’ Daphne

Il-programm, bit-tema Justice Demands Action, se jinkludi kunċert quddiem il-Funtana tat-Tritoni, diskussjonijiet pubbliċi, lecture u attivitajiet ta’ tifkira fis-16 ta’ Ottubru

Repubblika se torganizza programm ta’ ġimagħtejn ta’ attivitajiet biex tfakkar id-disa’ anniversarju mill-assassinju tal-ġurnalista Daphne Caruana Galizia, fosthom Concert for Justice fil-Belt Valletta.

Il-programm se jsir taħt it-tema Justice Demands Action u se jinkludi kunċerti, diskussjonijiet pubbliċi, lecture, workshop u numru ta’ attivitajiet ta’ tifkira.

L-għaqda appellat lil dawk li jemmnu fil-libertà tal-istampa, fil-protezzjoni ta’ persuni li jikxfu abbużi u f’istituzzjonijiet responsabbli lejn iċ-ċittadin biex jieħdu sehem fl-attivitajiet.

L-attivitajiet ta’ din is-sena se jsiru ftit ġimgħat wara li Yorgen Fenech ġie lliberat mill-akkużi kollha relatati mal-allegat involviment tiegħu fil-qtil ta’ Caruana Galizia.

Il-verdett kien wassal għal protesti f’Malta u barra. Fis-16 ta’ Settembru, eluf ta’ persuni mxew fit-toroq tal-Belt f’dimostrazzjoni li fiha esprimew solidarjetà mal-familja Caruana Galizia u kkritikaw dak li ddeskrivew bħala nuqqas li tinkiseb ġustizzja.

“As we showed on 16 September, our presence makes a difference,” qalet Repubblika, filwaqt li sostniet li l-preżenza tal-pubbliku turi lill-familja ta’ Caruana Galizia, lill-ġurnalisti u lill-whistleblowers li mhumiex waħedhom.

Kunċert għall-ġustizzja quddiem it-Tritoni

Il-programm se jibda s-Sibt 4 ta’ Ottubru bil-Protesta: Concert for Justice quddiem il-Funtana tat-Tritoni fil-Belt Valletta.

Għadd ta’ bands lokali se jitilgħu fuq il-palk mill-4pm ’il quddiem. Il-kunċert se jiġi organizzat minn Repubblika flimkien mal-Moviment Graffitti u Occupy Justice.

L-organizzaturi qalu li l-avveniment għandu jwassal messaġġ kontra dak li huma jiddeskrivu bħala korruzzjoni u rabtiet problematiċi bejn il-politika u n-negozju.

Diskussjonijiet, lecture u workshop

Fl-10 ta’ Ottubru, il-pubbliku se jkun mistieden għal Civic Convention Roundtable fl-10am fil-kampus tal-Università ta’ Malta fil-Belt.

Fil-15 ta’ Ottubru fis-6.30pm, Francesca Rispoli se tagħti lecture pubblika fil-kampus tal-Università fl-Imsida.

Il-programm jilħaq il-qofol tiegħu fis-16 ta’ Ottubru, id-data tal-assassinju ta’ Caruana Galizia.

Dakinhar, fl-10am, se jsir workshop dwar il-whistleblowing immexxi minn Anne Myers fil-Casino Maltese fil-Belt.

Fit-3pm se ssir laqgħa siekta fi Triq il-Bidnija, fil-post fejn splodiet il-bomba li qatlet lil Caruana Galizia.

Fis-6pm se ssir quddiesa b’suffraġju għaliha fil-Knisja ta’ San Franġisk fil-Belt, qabel attività kommemorattiva f’Bieb il-Belt fis-7pm.

Repubblika saħqet li t-tifkira waħedha mhix biżżejjed u li, fil-fehma tagħha, il-ħidma biex tinkiseb ġustizzja għadha ma ntemmitx.

L-għaqda qalet li hemm bżonn azzjoni biex il-ġurnalisti jkunu jistgħu jaħdmu mingħajr biża’, il-whistleblowers ikunu protetti u l-istituzzjonijiet iwettqu dmirhom.

“Disa’ snin huwa żmien twil,” qalet Repubblika. “Iżda ż-żmien ma jneħħix ir-responsabbiltà u lanqas itemm it-talba għall-ġustizzja.”

L-għaqda appellat ukoll għal donazzjonijiet biex tgħin tkopri l-ispejjeż tal-programm ta’ attivitajiet.

More in Kronaka