Momentum qed jappella lill-Gvern biex jieħu azzjoni mingħajr aktar dewmien u jagħti protezzjoni Grade 1 lill-barrakki Brittaniċi f’Fort Chambray.
Il-partit qal li, minkejja twissijiet ripetuti minn organizzazzjonijiet tal-wirt u r-rikonoxximent internazzjonali tal-valur storiku tas-sit, ma jarax biżżejjed rieda politika biex il-barrakki jingħataw protezzjoni sħiħa.
L-appell jasal wara li Europa Nostra, organizzazzjoni Ewropea tal-wirt, poġġiet lil Fort Chambray fuq lista qasira tal-aktar siti ta’ wirt mhedda fl-Ewropa.
L-organizzazzjoni kienet iddeskriviet il-barrakki bħala eżempju rari ta’ arkitettura militari Brittanika tas-seklu 19 u parti mill-istorja soċjali ta’ Malta.
Fl-istess waqt, kienet wissiet li l-barrakki jinsabu taħt theddida minħabba żvilupp approvat mill-Awtorità tal-Ippjanar f’Diċembru 2024.
Dak l-iżvilupp jinkludi aparthotel ta’ ħames stilel b’64 kamra, 50 serviced apartment u 105 unità residenzjali.
Wara żewġ appelli mressqa minn 11-il NGO u diversi individwi, it-Tribunal ta’ Reviżjoni tal-Ambjent u l-Ippjanar żamm fis-seħħ il-permessi marbuta mad-demolizzjoni u r-riżvilupp tas-sit.
Il-membru tal-kumitat ta’ Momentum Carmel Asciak qal li, fil-fehma tal-partit, is-sistema tal-ippjanar qed tagħti prijorità lill-interessi tal-iżvilupp fuq il-preservazzjoni tal-wirt.
Momentum qal ukoll li s-sit ilu għal snin twal mhux aċċessibbli għall-pubbliku, u li ġenerazzjoni sħiħa ma kellhiex l-opportunità żżur dak li ddeskriva bħala l-uniċi barrakki Brittaniċi f’Għawdex.
Il-partit sostna li, jekk jiġu protetti u restawrati, il-barrakki jistgħu jsiru attrazzjoni kulturali u turistika importanti.
Momentum għalhekk qed jitlob li l-barrakki jiġu ppreservati fl-intier tagħhom, restawrati u miftuħa għall-pubbliku.
Il-partit qal li Grade 1 huwa l-ogħla livell ta’ protezzjoni għall-wirt f’Malta u jkun ifisser li s-sit jinżamm fl-intier tiegħu, b’alterazzjonijiet limitati ħafna biss permessi.
“Il-wirt ta’ Għawdex mhux għall-bejgħ,” qal Asciak, filwaqt li appella lill-Gvern biex juri jekk hux lest jipproteġi l-wirt fil-prattika.