Il-Freedom Street Malta spiċċa taħt skrutinju wara tmiem il-ġimgħa mmarkat minn ġlied, problemi fil-kontroll tal-folol, persuni li daħlu f’attivitajiet mingħajr biljetti u interventi mill-Pulizija.
Sors li tkellem ma' din il-gazzetta waqt uħud mill-inċidenti qal li l-problemi żviluppaw fuq diversi jiem u ma kinux limitati għal lejl wieħed.
Skont is-sors, għadd kbir ta’ parteċipanti internazzjonali bdew jaslu Malta minn nhar l-Erbgħa għall-Freedom Street Europe, b’serje ta’ parties u attivitajiet mifruxa fuq ħamest ijiem konsekuttivi.
L-ewwel problemi serji li ra s-sors seħħew il-Ġimgħa filgħaxija.
Dakinhar kien hemm kunċert bħala parti mill-programm tal-Freedom Street, segwit minn afterparty li kellu jsir f’UNO f’Ta’ Qali.
Meta gruppi ta’ persuni marru lejn UNO, skont is-sors, bdiet pressjoni kbira fuq id-daħla hekk kif uħud ippruvaw jidħlu mingħajr biljetti.
Is-sors qal li kien hemm persuni jimbuttaw, jiġġieldu u jaqbżu minn fuq barrieri u ħitan biex jidħlu fil-post.
F’ċertu punt, qal is-sors, is-sitwazzjoni tant eskalat li l-membri tas-sigurtà ma baqgħux kapaċi jikkontrollaw il-folla b’mod normali.
Huwa sostna li, minħabba l-biża’ li l-konfrontazzjoni tkompli tikber, il-kontroll tal-biljetti spiċċa jitħalla fil-ġenb u persuni bdew jidħlu mingħajr ma jiġu ċċekkjati.
Skont is-sors, il-membri tas-sigurtà dehru li ma ridux jerfgħu r-responsabbiltà għal konfrontazzjoni fiżika akbar mal-folla u għalhekk f’ċertu punt fetħu d-dħul.
L-afterparty f’UNO eventwalment ġie kkanċellat.
Is-sors qal li l-parteċipanti ġew infurmati li l-attività ma kinitx se tkompli hemmhekk u li l-organizzaturi kellhom jagħmlu arranġamenti oħra b’mod urġenti.
Is-Sibt filgħaxija, skont l-istess sors, ġie organizzat party wara bidla li saret fl-aħħar mument.
Is-sors qal li anke hemmhekk reġgħu nqalgħu problemi simili.
Huwa qal li kien hemm ġlied, pressjoni fuq il-punti tad-dħul u problemi biex is-sigurtà żżomm kontroll ta’ min kien awtorizzat jidħol.
F’ċertu punt kellha tissejjaħ il-Pulizija biex tintervjeni.
Is-sors qal li l-problemi ma waqfux is-Sibt u reġgħu seħħew waqt l-aħħar attività tal-Ħadd.
Skontu, reġa’ kien hemm persuni li ppruvaw jidħlu mingħajr biljetti u reġgħu nqalgħu problemi ta’ kontroll tal-folla.
Huwa ddeskriva l-organizzazzjoni tal-attivitajiet bħala dgħajfa u qal li f’diversi mumenti l-għadd ta’ persuni preżenti deher jaqbeż dak li l-arranġamenti tas-sigurtà setgħu jlaħħqu miegħu.
Is-sors qal ukoll li għandu ritratti li, skontu, juru żoni mimlija lil hinn minn dak li deher li kien livell maniġġabbli ta’ folla.
B’mod separat, filmati li bdew jiċċirkolaw fuq TikTok u pjattaformi oħra tal-midja soċjali jidhru juru persuni f’KFC f’Paceville jidħlu fiż-żona ta’ wara l-bank.
Fil-filmati jidhru persuni jieħdu oġġetti minn żoni normalment riservati għall-ħaddiema.
Skont informazzjoni li waslet hemm ukoll allegazzjonijiet li wħud mill-oġġetti ttieħdu mingħajr ħlas.
Madankollu, dan il-punt jeħtieġ konferma indipendenti mill-operatur tal-istabbiliment jew mill-awtoritajiet.
L-attenzjoni għalhekk tibqa’ fuq il-livell ta’ organizzazzjoni, l-infurzar u l-kapaċità tas-sigurtà li tikkontrolla l-folol matul l-avvenimenti.
Wara l-problemi ripetuti, l-organizzaturi tal-festival ħabbru li l-afterparties li kien għad fadal kienu qed jiġu kkanċellati minħabba tħassib dwar is-sigurtà u l-kontroll tal-folol.
L-inċidenti f’Ta’ Qali ġew ukoll fl-isfond ta’ kritika dwar l-ammont ta’ skart li tħalla fl-inħawi wara l-avvenimenti.
Skont MaltaToday resident ta’ Ħ’Attard, Jack Attard Cassar, ippubblika ritratti tat-toroq li jwasslu lejn iż-żona tal-avvenimenti u qal li l-ammont ta’ skart li ra kien irrabjah.
Huwa ddeskriva skart mifrux fuq iż-żewġ naħat tat-triq, kif ukoll tazzi u fliexken f’żoni oħra madwar is-sit.
Attard Cassar esprima wkoll tħassib dwar il-messaġġ li xeni bħal dawn iwasslu dwar kif jiġu mmaniġġjati avvenimenti kbar u l-effett tagħhom fuq l-ambjent u l-komunitajiet tal-madwar.
Il-każ kollu jqajjem mistoqsijiet dwar jekk l-organizzaturi kellhomx pjan adegwat għall-kontroll tal-folol, jekk kienx hemm biżżejjed membri tas-sigurtà u x’miżuri kienu stabbiliti f’każ li gruppi kbar jippruvaw jidħlu mingħajr biljetti.
Jitqajmu wkoll mistoqsijiet dwar l-infurzar fuq il-post, partikolarment wara li s-sors qal li l-Pulizija kellha tintervjeni wara li nqalgħu ġlied u problemi fil-kontroll tal-folol.
