Id-Djoċesi ta’ Għawdex mhux se tieħu passi kanoniċi kontra Dun Michael Said, minkejja li l-qassis irrikonoxxa li kien influwenza familja biex twaqqaf il-proċeduri kontra erba’ rġiel akkużati bl-istupru ta’ binthom ta’ 14-il sena.
L-Isqof ta’ Għawdex Anton Teuma ħabbar id-deċiżjoni f’messaġġ bil-filmat ippubblikat il-Ġimgħa, wara li rċieva r-rapporti ta’ żewġ investigazzjonijiet dwar il-każ, li jmur lura għall-2008 u reġa’ ġie fl-attenzjoni pubblika f’Marzu li għadda.
Teuma qal li mill-investigazzjonijiet irriżulta li kien hemm influwenza min-naħa tal-qassis fuq il-familja, li wasslet biex il-każ jitwaqqaf. Huwa qal li dan joħroġ mix-xhieda oriġinali tal-ġenituri kif ukoll mill-firma tal-qassis, flimkien ma’ oħrajn, fuq il-ftehim milħuq bejn il-partijiet.
L-Isqof iddeskriva l-intervent bħala deċiżjoni li ma kinitx għaqlija, u qal li Dun Michael illum jirrikonoxxi li kien jaġixxi mod ieħor.
Madanakollu, Teuma qal li l-influwenza eżerċitata mill-qassis ma kinitx tammonta għal pressjoni intenzjonata u li l-azzjonijiet tiegħu kienu mmotivati mill-ġid tal-familja.
Skont l-Isqof, mix-xhieda tal-familja rriżulta li kienu huma li talbu l-għajnuna tal-qassis fiż-żmien tal-abbuż, minħabba li diġà kellu relazzjoni pastorali magħhom.
Teuma qal ukoll li għalkemm Dun Michael kien wieħed minn dawk li ffirmaw il-ftehim, li kien tfassal minn avukat, ma kienx hu li ħareġ bl-idea tal-ftehim u lanqas ma nnegozja l-ammont ta’ flus li kellu jitħallas biex jintemmu l-proċeduri ġudizzjarji.
Fid-dawl tal-konklużjonijiet taż-żewġ investigazzjonijiet, l-Isqof qal li se jimxi mar-rakkomandazzjoni li ma tittieħed ebda azzjoni kanonika kontra l-qassis.
Dun Michael Said qatt ma ġie mixli b’xi reat b’rabta mal-każ u ma kienx involut fl-abbuż tal-minuri.
Każ li jmur lura għall-2008
Il-każ reġa’ ħareġ fil-beraħ f’Marzu li għadda, wara li l-Qorti tal-Appell ikkonfermat il-ħelsien mill-akkużi tal-aħwa Mark Lorry Said, Peter Paul Said u Josef Said, kif ukoll ta’ Peter Paul Debono. Huma kienu ġew akkużati li abbużaw sesswalment u stupraw tifla ta’ 14-il sena fl-2008.
L-aħwa Said huma ħut l-eks deputat Nazzjonalista Chris Said, filwaqt li Dun Michael Said huwa qarib tagħhom.
Il-ħelsien mill-akkużi seħħ wara li l-allegata vittma, meta kienet adulta, aċċettat li twaqqa’ l-akkużi fl-2017 u fl-2020 wara ftehim barra l-qorti ta’ €120,000.
Minħabba l-liġi kif kienet fl-2008, il-pulizija ma setgħetx tkompli bil-proċeduri minn jeddha meta l-allegat abbuż kien seħħ fi proprjetà privata.
Fl-2008, Dun Michael kien ukoll wieħed mill-intermedjarji f’tentattiv biex jintlaħaq ftehim mal-familja permezz ta’ ħlas ta’ €7,000. Il-familja rtirat l-ilment l-għada, u b’hekk intemmu l-akkużi ta’ stupru. Aktar tard, madankollu, il-familja qalet fil-qorti li kienet aċċettat il-ftehim taħt pressjoni u li ddispjaċiha li ħadet il-flus.
Waħda miż-żewġ investigazzjonijiet imħabbra minn Teuma tmexxiet mill-Kummissjoni tas-Safeguarding tad-Djoċesi ta’ Għawdex biex jiġi stabbilit jekk kienx hemm xi riskju marbut mal-ħidma tal-qassis fl-iskejjel.
It-tieni investigazzjoni saret minn bord imwaqqaf mill-Isqof u magħmul minn imħallef irtirat, avukat u ġudikant fit-tribunal tal-Arċidjoċesi ta’ Malta.
Teuma qal li qabel ħa d-deċiżjoni eżamina s-sentenza tal-qorti u d-dikjarazzjonijiet ġuramentati tal-partijiet, qara ż-żewġ rapporti investigattivi, sema’ lill-familja u tkellem kemm mal-allegata vittma kif ukoll ma’ Dun Michael.
L-Isqof qal li jemmen li d-deċiżjoni tagħmel ġustizzja kemm mal-qassis kif ukoll mal-familja tal-allegata vittma, li qal baqgħet iżżomm relazzjoni tajba mal-qassis matul is-snin.
