“Mhux qed nitlob fondi. Qed nitlob biss li nagħtu ġieħ lil persuna li tat faraġ lil eluf ta’ Maltin.”
Għal ħafna Maltin, Ġorġ Agius – magħruf aħjar bħala Ġorġ tal-Mużew – ma kienx tabib, infermier jew uffiċjal fl-Isptar Mater Dei. Madankollu, għal snin twal kien wieħed mill-aktar uċuħ familjari fil-kurituri tal-isptar, fejn bil-preżenza tiegħu, bit-tbissima u bil-kelma t-tajba kien jagħti kuraġġ lill-pazjenti, qraba u anke ħaddiema.
Illum, ħames snin wara li beda jippromovi l-idea, Mark Schembri għadu determinat li dik il-memorja ma tintesiex.
Ix-xewqa tiegħu hija waħda sempliċi: li f’Mater Dei jitwaqqaf bust żgħir b’tifkira ta’ Ġorġ tal-Mużew, sabiex il-ġenerazzjonijiet futuri jibqgħu jiftakru f’persuna li, mingħajr ebda kariga jew interess personali, irnexxielha tħalli marka fil-ħajja ta’ eluf ta’ nies.
U Schembri jinsisti fuq punt wieħed mill-bidu sal-lum.
“Mhux qed nitlob fondi mingħand il-Gvern. Qed nitlob biss li jingħata rikonoxximent lil persuna li għamlet tant ġid.”
Minn post fuq Facebook għal kampanja ta’ ħames snin
Dak li beda bħala appell fuq il-midja soċjali ma damx ma beda jiġbed l-attenzjoni ta’ ħafna nies.
Il-proposta ta’ Schembri kienet sempliċi iżda b’saħħitha: jekk hemm persuna li ħaqqha tibqa’ mfakkra ġewwa Mater Dei, dik hija Ġorġ tal-Mużew.
Il-post qajjem mijiet ta’ kummenti u reazzjonijiet mingħand persuni li qasmu l-esperjenzi tagħhom ma’ Ġorġ, filwaqt li oħrajn sostnew li bust fil-post fejn qatta’ tant snin ikun l-isbaħ mod kif il-pajjiż jirringrazzjah.
Skont Schembri, ir-rispons li rċieva kien dak li tah il-kuraġġ biex ma jaqtax qalbu.
Il-proposta tasal għand il-Prim Ministru
Matul dawn is-snin, Schembri ma waqafx biss fuq il-midja soċjali.
Huwa kiteb direttament lill-Prim Ministru Robert Abela fejn spjegalu l-proposta tiegħu.
Fit-tweġiba li rċieva, il-Prim Ministru infurmah li s-suġġeriment kien ġie nnutat u mgħoddi lill-Ministeru kkonċernat sabiex jiġi kkunsidrat.
Schembri wieġeb b’mod sempliċi iżda sinċier.
“Nittama li din ix-xewqa ta’ ħafna nies tiġi mwettqa,” kiteb lura, filwaqt li rringrazzja lill-Prim Ministru.
Għalih, dik it-tweġiba kienet tfisser li l-proposta kienet waslet fuq il-mejda ta’ dawk li jistgħu jieħdu deċiżjoni.
Il-każ jasal ukoll fil-Parlament
L-inizjattiva aktar tard sabet appoġġ ukoll fil-Parlament.
Id-Deputat Nazzjonalista Ivan Castillo mhux biss ressaq Mistoqsija Parlamentari lill-Ministru għas-Saħħa ta’ dak iż-żmien, Jo Etienne Abela, iżda bagħat ukoll email uffiċjali fejn talab lill-Ministeru jikkunsidra formalment il-proposta.
Fil-korrispondenza tiegħu, Castillo fakkar kif Ġorġ tal-Mużew kien persuna magħrufa u maħbuba minn ħafna, li għal snin twal ġab ferħ u tama lil dawk li kienu għaddejjin minn mumenti diffiċli ġewwa Mater Dei.
Huwa rrimarka wkoll li l-inizjattiva kienet qed tiġi sostnuta minn numru sostanzjali ta’ ċittadini u staqsa jekk il-Ministeru kienx lest jevalwa l-proposta jew jispjega liema proċeduri jeżistu biex tifkira bħal din tkun tista’ titqies.
Il-mistoqsija parlamentari, irreġistrata bħala PQ 33800, talbet lill-Ministru jwieġeb jekk il-proposta kinitx qed tiġi kkunsidrata.
Aktar minn bust
Għal Schembri, il-bust ma jirrappreżentax sempliċement statwa.
Huwa jqisu bħala simbolu ta’ gratitudni lejn persuna li qatt ma fittxet unuri jew pubbliċità.
Jgħid li Ġorġ ma kienx magħruf għall-flus, għall-poter jew għall-pożizzjoni tiegħu, iżda għall-ħin li kien jagħti lill-oħrajn u għall-kapaċità tiegħu li jġib tbissima fuq wiċċ min kien qed ibati.
“Hemm nies li jibqgħu mfakkra għall-kariga li kellhom. Ġorġ għandu jibqa’ mfakkar għall-imħabba li wera lejn in-nies,” sostna.
Tifkira fil-Birgu
Fl-aħħar jiem, fil-jum li fih tfakkar il-100 anniversarju mit-twelid ta’ Ġorġ Agius, il-Kunsill Lokali tal-Birgu inawgura mafkar f’ġieħu quddiem id-dar fejn kien joqgħod.
Il-mafkar, xogħol tal-artist Clive Busuttil, ġie inawgurat waqt attività li fakkret il-ħajja u l-kontribut ta’ Ġorġ lejn il-komunità.
Iżda għal Schembri, dawn iż-żewġ inizjattivi mhumiex alternattivi għal xulxin.
Anzi.
Huwa jgħid li filwaqt li l-mafkar fil-Birgu jagħti ġieħ lill-belt li rat lil Ġorġ jitwieled u jgħix, Mater Dei huwa l-post fejn eluf ta’ Maltin tgħallmu jafuh.
“Hemmhekk kien iqatta’ l-ġranet tiegħu. Hemmhekk kien jagħti kuraġġ lill-pazjenti. Hemmhekk sar parti mill-ħajja ta’ tant familji Maltin. Għalhekk nemmen li hemmhekk għandu jkun hemm ukoll tifkira permanenti tiegħu.”
“Mhux se naqta’ qalbi”
Minkejja li għaddew ħames snin minn meta beda din il-ħidma, Schembri jgħid li mhux lest jabbanduna l-proposta.
Jgħid li matul dan iż-żmien għamel kuntatti ma’ awtoritajiet, kiteb lill-ogħla uffiċjali tal-pajjiż u ra wkoll il-proposta tasal sal-Parlament.
Issa jittama li l-pass li jmiss ikun wieħed konkret.
Għax, kif jisħaq hu stess, din mhijiex kwistjoni politika u lanqas personali.
“Hija kwistjoni ta’ rispett lejn persuna li tat tant mingħajr ma qatt stenniet xejn lura.”
U filwaqt li Ġorġ tal-Mużew diġà għandu mafkar fil-Birgu, Mark Schembri jemmen li l-akbar ġieħ li jista’ jingħatalu jibqa’ wieħed: li l-bniedem li ta tant tama bejn il-ħitan ta’ Mater Dei jibqa’ mfakkar għal dejjem proprju fl-isptar li tant kien iħobb.
"Dan il-bust, mhux biss ifakkar dan il-qaddis li hex fostna, imma tifkira fejn tispikka l-umanita, id-dover u ta qalb tajba, li minnhu ghandna nitghallmu lkoll "
"Jimmeritah li jsirlu bust f'belt twellidu, pero Gorg hareg min hemm u dar kull sptar, dar ta l-anzjani u f'kull fejn seta jwassal il-kelma t'Alla bi kliem poetiku uniku tieghu"
.png)
