Raġel jinżamm arrestat wara li wieġeb mhux ħati li weġġa' gravi mara

Raġel ta' 46 sena mir-Rabat, wieġeb mhux ħati wara li tressaq il-Qorti akkużat li kkaġuna ġrieħi gravi lil mara f'allegat każ ta' vjolenza domestika.

Skont l-akkużi, l-allegat każ seħħ bejn l-10:00pm u l-11:00pm tas-26 ta' Lulju f'residenza fir-Rabat.
Il-prosekuzzjoni qed takkuża lil akkużat li kkaġuna ġrieħi gravi lil vittma u li kkaġunalha wkoll xi ġrieħi. Huwa akkużat ukoll li wettaq ir-reati meta kien reċidiv.

Il-prosekuzzjoni tmexxiet mill-Avukat tal-Avukat Ġenerali Krista Spiteri Lucas flimkien mal-Ispettur Carlos Cordina.
Id-difiża talbet għall-ħelsien mill-arrest.

Madankollu, il-prosekuzzjoni oġġezzjonat, u sostniet li s-serjetà tal-akkużi waħedha kienet biżżejjed biex il-ħelsien mill-arrest ma jingħatax.

Żiedet ukoll li kemm l-imputat kif ukoll il-vittma jgħixu r-Rabat, u għalhekk kien hemm il-biża' li l-imputat seta' jikkuntattja jew jinfluwenza lill-vittma qabel ma din tixhed fil-Qorti.

Il-Qorti laqgħet l-oġġezzjonijiet tal-prosekuzzjoni, ċaħdet it-talba għall-ħelsien mill-arrest, u ħarġet ordni ta' protezzjoni favur il-vittma.