Minkejja li r-residenti tas-Swieqi qed jgħidu li s-servizz il-ġdid tal-Pulizija ta' matul il-lejl u n-numru dedikat ta' WhatsApp introduċew titjib sostanzjali fir-rispons għall-inċidenti, huma jinsistu li għad hemm lakuna importanti li qed tħalli lill-lokalità vulnerabbli fis-sigħat bikrin ta' filgħodu.
Skont residenti li tkellmu ma' dan is-sit, is-servizz li beda jopera fit-2 ta' Ġunju qed jaħdem b'mod effiċjenti, tant li f'ċerti każijiet il-pulizija waslet fuq il-post fi ftit sekondi biss minn meta sar ir-rapport permezz tal-WhatsApp.
Madankollu, huma jgħidu li l-problema tibda hekk kif jintemm dan is-servizz fil-5:30 ta' filgħodu. Huwa proprju għalhekk li issa qed isiru appelli biex il-WhatsApp dedikat u l-kopertura tal-pulizija jiġu estiżi għal 24 siegħa kuljum matul ix-xhur tas-sajf.
L-appelli ġodda waslu wara sensiela ta’ rapporti dwar storbju, vandaliżmu u mġiba antisoċjali fil-lokalità, inkluż każ irrappurtat nhar l-Erbgħa għall-ħabta tal-5:00 ta’ filgħodu. fi Triq l-Irqiegħ, fejn allegatament twaddbu fliexken u nstema’ tħabbit fuq l-intercoms ta’ blokka appartamenti, b’residenti jgħidu li tqajmu minn dan l-istorbju.
Fl-istess waqt, fuq Facebook bdiet tiċċirkola ittra miftuħa lill-Prim Ministru Robert Abela, li fiha residenti qed jitolbu li l-Għassa tal-Pulizija tas-Swieqi tkun miftuħa 24 siegħa kuljum, sebat ijiem fil-ġimgħa, flimkien ma’ aktar rondi bil-mixi kemm matul il-jum kif ukoll billejl. Fl-ittra jingħad ukoll li jekk m’hemmx biżżejjed uffiċjali tal-pulizija, għandhom jiġu reklutati aktar, filwaqt li kull min jikser il-liġi għandu jinżamm responsabbli irrispettivament min-nazzjonalità tiegħu.
“Il-Pulizija ta’ matul il-Lejl qed taħdem eċċellenti”
Madankollu, sorsi qrib grupp ta’ residenti sostnew ma’ dan is-sit li l-problema mhijiex il-Pulizija tal-Lejl innifisha.
Skont is-sors, is-servizz dedikat li beda fit-2 ta’ Ġunju, flimkien ma’ numru ta’ WhatsApp apposta għar-rapporti bejn l-10:00 p.m. u l-5:30 a.m., kien suċċess.
“F’wieħed mill-inċidenti tal-ġimgħa li għaddiet, il-pulizija waslet fi ftit sekondi. Lanqas minuti. Ir-rispons kien immedjat u l-uffiċjali kienu ta’ għajnuna kbira,” qal is-sors.
Ir-residenti jgħidu li meta jintbagħat rapport permezz tal-WhatsApp, ħafna drabi jiġi rikonoxxut minnufih u l-pulizija tasal fuq il-post fi żmien qasir ħafna.
Il-lakuna bejn il-5:30 u t-8:00 ta’ filgħodu
Skont l-istess sors, il-problema ewlenija tibda meta jintemm is-servizz ta’ matul il-lejl.
Bejn il-5:30 u t-8:00 ta’ filgħodu, meta ħafna persuni jkunu għadhom ġejjin minn Paceville jew minn attivitajiet oħra, ir-residenti jkollhom jikkuntattjaw lill-Għassa ta’ San Ġiljan, li tkopri wkoll lokalitajiet oħra fosthom Pembroke, Tal-Ibraġġ u l-Madliena.
Ir-residenti jsostnu li dan iwassal biex ir-rispons ikun aktar bil-mod, filwaqt li matul il-ġurnata s-servizz tal-Community Policing juża diversi numri tat-telefown, u mhux dejjem ikun ċar liema uffiċjal ikun xogħol f’dak il-ħin.
Appell għal WhatsApp 24 siegħa kuljum
Minflok jitolbu li jinbidel il-mudell attwali, ir-residenti qed jipproponu li dak li diġà qed jaħdem jiġi estiż.
Il-proposta tagħhom hi li n-numru dedikat ta’ WhatsApp jibda jopera 24 siegħa kuljum matul ix-xhur tas-sajf, sakemm eventwalment is-Swieqi jkollha għassa tal-pulizija permanenti u mgħammra kompletament.
Skont is-sors, din tkun l-aktar soluzzjoni prattika u effiċjenti biex il-pulizija tibqa’ tirċievi rapporti malajr u tirreaġixxi b’mod immedjat.
Il-Kunsill Lokali ilu jwissi dwar is-sitwazzjoni
Il-pożizzjoni tar-residenti taqbel ma’ dik tal-Kunsill Lokali tas-Swieqi, li f’dokument ippubblikat isostni li ilu snin jappella lill-Gvern biex jindirizza l-problemi ta’ storbju, vandaliżmu, skart u nuqqas ta’ sigurtà fil-lokalità, filwaqt li jgħid li ppreżenta 12-il proposta biex titjieb is-sitwazzjoni. Dawn jinkludu regolamentazzjoni aktar stretta tal-akkomodazzjoni għal kiri għal żmien qasir, infurzar aktar b’saħħtu kontra l-istorbju, u kordinazzjoni akbar bejn l-awtoritajiet.
Il-multi huma deterrent biżżejjed?
L-istess sors sostna li l-pieni attwali għall-ksur tal-paċi pubblika għadhom baxxi wisq biex iservu ta’ deterrent effettiv.
Skont il-Kodiċi Kriminali, il-kontravenzjoni ta’ tfixkil tal-paċi pubblika hija koperta mill-Artikolu 338(1)(dd), filwaqt li meta ma jkunx hemm piena speċifika tapplika l-emenda ġenerali prevista fl-Artikolu 13(1). Is-sors sostna li dawn il-pieni ilhom ma jiġu aġġornati snin twal u li għal ħafna turisti, multi relattivament baxxi ma jagħmlux differenza.
Huwa għalhekk li qed isir appell biex il-leġiżlazzjoni tiġi emendata u l-multi għall-istorbju jiżdiedu sostanzjalment, bil-għan li jservu bħala deterrent aktar effettiv.
Filwaqt li r-residenti qed jirrikonoxxu li l-miżuri introdotti dan is-sajf qed jagħtu riżultati pożittivi, huma jinsistu li għad hemm bżonn aktar azzjoni sabiex is-Swieqi jgawdi minn kopertura effettiva ta’ infurzar matul il-ġurnata kollha, speċjalment fl-eqqel tal-istaġun tas-sajf.
.png)
