MRU twissi dwar dgħajjes li jbaħħru b'veloċità eċċessiva f'żoni protetti ta' Kemmuna

Il-Malta Ranger Unit (MRU) qajmet tħassib dwar dgħajjes li qed ibaħħru b'veloċità eċċessiva f'żoni ristretti jew protetti wara li ppubblikat filmat li juri għawwiem jevita għal ftit li jintlaqat minn dgħajsa f'Kemmuna.

Skont l-MRU, fil-filmat jidher li l-persuna li kienet qed issuq id-dgħajsa kienet distratta waqt li kienet qed titkellem ma' turisti abbord.

L-għaqda qalet li inċidenti bħal dawn mhumiex rari, u sostniet li ta' spiss tosserva skippers jużaw il-mobile tagħhom waqt li jkunu qed isuqu d-dgħajsa b'veloċità għolja mingħajr ma jagħtu kas ta' dak li hemm quddiemhom.

L-MRU esprimiet ukoll tħassib dwar il-konsum tal-alkoħol abbord xi dgħajjes, u sostniet li dan għandu jitqies bħala l-ekwivalenti ta' "xorb u sewqan."

"X'qegħdin nistennew? Li jmut xi ħadd?" staqsiet l-għaqda.

L-MRU wissiet li navigazzjoni irresponsabbli ma toħloqx biss riskju għas-sigurtà tan-nies, iżda wkoll għall-ħajja fil-baħar.

L-għaqda appellat lill-awtoritajiet biex iżidu l-edukazzjoni fost l-operaturi tal-bastimenti u jsaħħu l-infurzar fuq il-baħar.