Investigazzjoni wara suspett ta’ avvelenament mill-ikel li wassal biex 18-il persuna ddaħħlu l-isptar

L-Awtorità għas-Sigurtà u s-Sikurezza tal-Ikel bdiet investigazzjoni wara li 18-il persuna ddaħħlu l-Isptar Mater Dei b’suspett ta’ avvelenament mill-ikel wara inċident fuq post tax-xogħol.

L-inċident seħħ il-Ħamis filgħaxija, meta d-dipartimenti tal-Emerġenza fl-isptar irreġistraw żieda f’daqqa ta’ pazjenti li ppreżentaw sintomi kompatibbli ma’ avvelenament mill-ikel.

L-awtorità qalet li ġiet infurmata mis-Supretendent tas-Saħħa Pubblika li numru ta’ ħaddiema kellhom bżonn kura medika, u minnufih bdiet l-ispezzjonijiet meħtieġa fl-istabbiliment involut.

Kelliem għall-Ministeru tas-Saħħa kkonferma li 18-il pazjent iddaħħlu l-Isptar Mater Dei. Skont l-istess kelliem, il-maġġoranza tagħhom qed ibatu minn sintomi ħfief u mistennija jingħataw il-ħruġ mill-isptar.

Madankollu, mill-inqas żewġ persuni se jinżammu l-isptar taħt osservazzjoni matul il-lejl.

Is-Supretendenza tas-Saħħa Pubblika ġiet infurmata bil-każ, filwaqt li d-Dipartiment tal-Kura tas-Saħħa Primarja jinsab fuq allert f’każ li jitfaċċaw aktar każijiet fis-sigħat li ġejjin.

Il-Ministeru tas-Saħħa qal li aktar aġġornamenti dwar l-investigazzjoni mistennija jinħarġu aktar tard.