L-Għassa tal-Pulizija tal-Komunità ta’ Swieqi u Pembroke bdiet twettaq rondi dedikati matul il-lejl sabiex tindirizza l-isfidi marbuta maż-żieda fl-attività turistika li tkun partikolarment intensa matul ix-xhur tas-sajf.
Waqt żjara fl-għassa nhar it-Tlieta, il-Ministru għall-Intern, is-Sigurtà u x-Xogħol Glenn Bedingfield saħaq fuq l-importanza li jiġu mħarsa l-ordni pubbliku u l-kwalità tal-ħajja tar-residenti.
Huwa spjega li l-uffiċjali qed ikopru l-lokalitajiet kollha ta’ Swieqi u Pembroke, b’attenzjoni partikolari lejn żoni identifikati bħala hotspots minħabba l-attività intensiva li tesperjenza l-inħawi.
Il-kunċett tal-Pulizija tal-Komunità kien tnieda għall-ewwel darba fil-Mellieħa fl-2019 bħala parti minn riforma usa’ fil-Korp tal-Pulizija, bil-għan li jissaħħu r-relazzjonijiet bejn il-pulizija u l-komunitajiet lokali.
Swieqi u Pembroke kienu fost l-ewwel lokalitajiet li bbenefikaw minn dan il-mudell fl-2020. Illum, madwar 170 uffiċjal tal-Pulizija tal-Komunità qed joperaw f’Malta u Għawdex.
Il-Pulizija qalu li dawn l-uffiċjali jżommu kuntatt regolari mar-residenti, fosthom permezz ta’ laqgħat li jsiru kull tliet xhur biex jiġu diskussi l-isfidi u l-prijoritajiet ta’ kull lokalità.
It-tim tal-Pulizija tal-Komunità ta’ Swieqi juża wkoll diversi mezzi ta’ komunikazzjoni biex jibqa’ f’kuntatt mal-pubbliku, inkluż paġna fuq Facebook u kanal dedikat fuq WhatsApp.
Bedingfield qal li s-servizz intlaqa’ tajjeb ħafna mir-residenti, li issa għandhom mezzi diretti biex jikkomunikaw mal-pulizija.
“Permezz ta’ dan is-servizz qed inkunu nistgħu nirreaġixxu aktar malajr għat-tħassib u r-rapporti li jaslu mingħand ir-residenti,” qal il-Ministru, filwaqt li rringrazzja lill-uffiċjali li jaħdmu fl-inħawi ta’ Swieqi u Pembroke.
Il-Korp tal-Pulizija ħabbar ukoll li fil-ġimgħat li ġejjin se jkompli jsaħħaħ ir-riżorsi tiegħu permezz ta’ reklutaġġ ġdid, b’numru ta’ uffiċjali mistennija jingħaqdu mal-korp matul ix-xahar ta’ Lulju.
.png)
