Il-Partit Nazzjonalista kkritika lill-Gvern talli ma nnegozjax prezz fiss għall-provvista tal-gass lill-power station ta’ Delimara, u sostna li dan jista’ jwassal biex il-konsumaturi jew il-finanzi pubbliċi jġorru l-piż ta’ żidiet futuri fil-prezzijiet.
Fi stqarrija maħruġa t-Tlieta, il-PN qal li filwaqt li l-Gvern qed jippreżenta l-ftehim mal-kumpanija BP bħala suċċess, issa ġie kkonfermat li l-prezz tal-gass se jkun marbut mas-suq internazzjonali u mhux maqful b’rata stabbilita minn qabel.
Il-partit irrefera wkoll għall-qtugħ tad-dawl li reġa’ beda jseħħ f’diversi lokalitajiet hekk kif beda s-sajf, u qal li kien grazzi għall-pressjoni tal-Oppożizzjoni li ħareġ fil-beraħ li ma kienx intlaħaq qbil fuq prezz fiss għall-gass.
Il-kritika saret wara li l-Ministru għall-Enerġija Miriam Dalli spjegat li l-ftehim għall-provvista tal-gass naturali likwifikat (LNG) sa Mejju tas-sena d-dieħla ġie konkluż direttament bejn l-Enemalta u BP. Hija qalet li l-kumpanija nazzjonali se tkun qed tħallas skont il-prezzijiet tas-suq, marbuta mal-indikatur Ewropew TTF.
Skont il-PN, minkejja li l-Gvern kien akkuża lill-Oppożizzjoni li kienet qed toħloq allarm bla bżonn dwar il-provvista tal-gass, kemm il-Prim Ministru Robert Abela kif ukoll il-Ministru Dalli kellhom jammettu li l-ispiża finali se tibqa’ tiddependi fuq il-prezzijiet internazzjonali.
Il-partit sostna li waqt id-diskussjoni fil-Parlament it-Tnejn, il-Ministru setgħet tagħti biss indikazzjoni ta’ kemm qed tiswa bħalissa l-elettriku prodott mill-interconnector u kemm jista’ jiswa taħt il-ftehim il-ġdid, iżda ma tatx dettalji dwar jekk jeżistix limitu massimu għall-prezz li Malta tista’ tispiċċa tħallas jekk il-gass jerġa’ jogħla fis-swieq internazzjonali.
Il-PN argumenta wkoll li l-fatt li l-ftehim ikopri biss perjodu relattivament qasir jindika li ma kienx possibbli li jintlaħaq arranġament aktar favorevoli fit-tul.
Skont il-partit, dan juri wkoll nuqqas ta’ ppjanar min-naħa tal-Gvern, li kien ilu jaf għal snin sħaħ meta kien se jiskadi l-kuntratt eżistenti iżda, minkejja dan, beda n-negozjati fl-aħħar xhur qabel l-iskadenza tiegħu.
L-Oppożizzjoni rrimarkat ukoll li l-Ministru Dalli stess iddeskriviet il-ftehim bħala soluzzjoni temporanja, filwaqt li kkonfermat li diġà bdew preparazzjonijiet għal arranġamenti ġodda ta’ xiri tal-LNG wara li dan il-ftehim jiskadi f’Mejju li ġej.
Il-PN temm jgħid li dawn l-iżviluppi jkomplu juru n-nuqqas ta’ strateġija fit-tul fis-settur tal-enerġija, u akkuża lill-Gvern li ħalla l-kwistjoni sal-aħħar mumenti minkejja li kien ilu jaf meta kien se jintemm il-kuntratt attwali.
