Moviment Graffitti appellat lill-pubbliku biex jissottometti oġġezzjonijiet formali kontra żvilupp propost tul il-kosta ta’ Tas-Sliema u l-Gżira li, skont l-għaqda, se jwassal għal aktar privatizzazzjoni tal-kosta u ħsara lill-ambjent marittimu.
L-applikazzjoni, bin-numru PA/03174/26, ġiet ippreżentata minn grupp ta’ negozjanti prominenti u tipproponi l-bini ta’ lido privat li jinkludi pixxina fil-beraħ, sun deck u żewġ binjiet biex jakkomodaw faċilitajiet relatati mal-pixxina, ristoranti u żona għat-tfal.
Skont Moviment Graffitti, sa issa diġà tressqu madwar 200 oġġezzjoni kontra l-proġett.
Fi stqarrija, l-għaqda sostniet li wara snin ta’ żvilupp intensiv fuq l-art, issa l-iżviluppaturi qed jimmiraw ukoll lejn il-baħar. Hija wissiet li l-proġett se jbiddel b’mod permanenti l-kosta u se jokkupa spazju pubbliku li bħalissa huwa miftuħ għall-komunità.
Moviment Graffitti argumentat li s-sit inkwistjoni jinsab f’żona barra mill-konfini tal-iżvilupp u huwa identifikat bħala spazju pubbliku miftuħ fil-Pjan Lokali tan-North Harbour.
L-għaqda qalet li Tas-Sliema u l-Gżira diġà qed iġorru l-piż ta’ snin ta’ kummerċjalizzazzjoni żejda, b’bankini okkupati minn imwejjed u siġġijiet, bini intensiv li biddel il-linja tal-orizzont u deċiżjonijiet ta’ ppjanar li, skontha, naqqsu l-aċċess tal-pubbliku għall-kosta.
Skont Moviment Graffitti, il-lido propost mhux biss se jostakola l-veduti tul il-promenade iżda jista’ wkoll iżid il-konġestjoni f’waħda mill-aktar żoni popolari u traffikużi fil-pajjiż.
L-għaqda qajmet ukoll tħassib ambjentali, u sostniet li r-riklamazzjoni tal-baħar meħtieġa għall-proġett tista’ taffettwa habitats marini protetti u tikkawża ħsara lill-qiegħ tal-baħar.
Moviment Graffitti appellat lill-Awtorità tal-Ippjanar biex tieħu inkunsiderazzjoni l-obbligi tagħha taħt il-Pjan Lokali tan-North Harbour, il-liġijiet Maltin u Ewropej dwar l-ambjent, l-Att dwar id-Dominju Pubbliku, l-SPED u diversi konvenzjonijiet internazzjonali relatati mal-protezzjoni tal-kosta u l-ambjent marittimu.
L-għaqda sostniet li approvazzjoni ta’ dan il-proġett tibgħat il-messaġġ li r-regoli tal-ippjanar jistgħu jiġu mwarrba meta jkun hemm interessi ekonomiċi b’saħħithom warajhom.
Hija insistiet li r-residenti, l-għawwiema, il-familji u dawk li jużaw il-promenade għandhom jingħataw prijorità fuq interessi privati.
Moviment Graffitti qed titlob li l-applikazzjoni PA/03174/26 tiġi miċħuda kompletament, filwaqt li appellat għal valutazzjonijiet aktar serji tal-impatti soċjali u ambjentali ta’ proġetti simili fil-futur.
L-oġġezzjonijiet jistgħu jintbagħtu lill-Awtorità tal-Ippjanar sal-19 ta’ Ġunju permezz tal-indirizz elettroniku [email protected], filwaqt li għandu jissemma n-numru tal-applikazzjoni PA/03174/26.
