Il-partit Momentum esprima tħassib dwar id-diffikultajiet li qed jaffaċċjaw votanti Maltin li jgħixu barra minn Malta meta jippruvaw jirritornaw biex jivvutaw fl-elezzjoni li ġejja.
Fi stqarrija, il-partit talab lill-KM Airlines u lill-awtoritajiet relevanti biex jintroduċu sistema ta’ bookings online dedikata għall-ivvjaġġar relatat mal-elezzjoni, li tkun kapaċi tlaħħaq mad-domanda u toffri diversi mezzi ta’ booking.
Il-partit enfasizza wkoll il-ħtieġa għal komunikazzjoni ċara u f’waqtha biex il-votanti jkunu jafu kif jistgħu jużaw dawn is-servizzi hekk kif jiġu introdotti.
“Id-demokrazija għandha tkun aċċessibbli għal kulħadd, u nuqqasijiet amministrattivi m’għandhomx ifixklu d-dritt tal-vot,” qal il-partit.
Filwaqt li rrikonoxxa li KM Airlines introduċiet tariffi mnaqqsa għall-votanti, Momentum sostna li mhuwiex aċċettabbli li l-proċess ta’ booking ikun limitat għal hotline telefonika biss, li skont il-partit qed taffaċċja diffikultajiet biex tlaħħaq mal-volum ta’ sejħiet.
Il-membru tal-kumitat Graziella Spiteri qalet li ġew irrappurtati każijiet fejn votanti kellhom jagħmlu diversi tentattivi mingħajr suċċess biex jikkuntattjaw is-servizz.
Hija żiedet li s-sitwazzjoni attwali tista’ twassal biex xi votanti jiġu esklużi mill-proċess elettorali u tnaqqas il-fiduċja fil-proċess demokratiku.
.png)
