Il-vapur Russu tal-gass likwifikat Arctic Metagaz, li kien diġà ġarrab ħsarat serji, jidher li tħalla f’nofs il-baħar wara li l-operazzjoni ta’ salvataġġ mmexxija mil-Libja ma komplietx.
Skont informazzjoni minn sorsi miftuħa, it-tugboat Maridive 701, li kienet qed tirmonka l-vapur, mexxietu għal madwar 105 mil nawtiku lejn it-tramuntana u l-grigal tal-port Libjan ta’ Misrata. Din id-distanza tqiegħed il-vapur eżatt fuq il-limiti taż-żona ta’ tfittxija u salvataġġ (SAR) ta’ Malta.
Jidher li l-awtoritajiet Libjani ddeċidew li jbiegħdu l-vapur aktar ‘il barra mill-kosta minħabba kundizzjonijiet tat-temp li qed jiddeterjoraw fil-Mediterran ċentrali.
L-Arctic Metagaz kien ġie milqut minn drones marittimi fil-bidu ta’ Marzu waqt li kien qed jivvjaġġa f’ibħra internazzjonali. Hemm suspett li l-attakk sar mill-Ukrajna, iżda dan qatt ma ġie kkonfermat uffiċjalment. Ir-Russja akkużat lill-Ukrajna direttament, filwaqt li Kyiv ma kkummentatx jew ċaħdet ir-responsabbiltà.
Il-vapur jagħmel parti minn dik li hija magħrufa bħala “shadow fleet” Russa, li tintuża biex jiġu evitati s-sanzjonijiet internazzjonali, u kien qed iġorr tagħbija ta’ gass naturali likwifikat flimkien ma’ tipi oħra ta’ fjuwil.
Wara l-attakk, l-ekwipaġġ abbanduna l-vapur u ġie salvat minn bastiment merkantili Russu ieħor. Il-vapur baqa’ jbaħħar bla kontroll, filwaqt li l-awtoritajiet Taljani u Maltin kienu qed jimmonitorjaw il-pożizzjoni tiegħu.
Meta daħal fiż-żona SAR tal-Libja, il-pajjiż nieda operazzjoni ta’ salvataġġ bil-għan li jirmonka l-vapur u possibilment iħott il-kargu perikoluż tiegħu. Madankollu, l-aħħar żviluppi jissuġġerixxu li din l-operazzjoni twaqqfet, u hemm il-possibbiltà li l-Arctic Metagaz jerġa’ jidħol taħt ir-responsabbiltà ta’ Malta.
Is-sitwazzjoni tibqa’ waħda delikata, speċjalment minħabba r-riskji ambjentali u ta’ sigurtà marbuta mat-tagħbija tal-vapur u l-kundizzjonijiet tal-baħar.
