MIDI plc ikkonfermat illi l-ftehim sabiex Manoel Island u l-Forti Tigne jiġu trasferiti lura lill-gvern intlaħaq bi qbil dwaru miż-żewġ partijiet, hekk kif id-deċiżjoni issa qiegħda tistenna l-approvazzjoni tal-azzjonisti tal-kumpanija.
Nhar it-Tnejn li għadda, il-Prim Ministru Robert Abela kkonferma li MIDI aċċettat offerta ta’ €43 miljun biex tittrasferixxi l-artijiet lura lill-gvern.
Dan wara petizzjoni popolari minn attivisti fl-2024 li ġabret aktar minn 29,000 firma. L-attivisti appellaw sabiex il-gżira tinbidel f’park ta’ wirt naturali. Dawk li għamlu kampanja ħadmu mar-residenti, NGOs u esperti biex jerġgħu jimmaġinaw kif jista’ jidher il-park.
F’avviż tal-kumpanija nhar il-Ġimgħa, il-kumpanija qalet illi l-ftehim se jkollu bżonn ukoll l-approvazzjoni tal-parlament.
MIDI spjegat li l-litigazzjoni kollha li għaddejja bejnha u l-gvern ġiet sospiża sakemm jingħataw l-approvazzjonijiet.
Tħabbar illi d-dettalji kollha tal-ftehim tat-trasferiment tal-art se jiġu spjegati lill-azzjonisti fil-laqgħa ġenerali straordinarja tal-kumpanija.
