Il-partit Momentum talab kjarifika mingħand Transport Malta u l-American University of Malta (AUM) dwar il-ġestjoni, l-operat u l-awtorizzazzjoni ta’ faċilitajiet ta’ irmiġġ u marina tul il-front tal-baħar ta’ Bormla.
F’ittri separati indirizzati liż-żewġ entitajiet, Momentum esprima tħassib dwar jekk is-sidien tad-dgħajjes li qed jirmiġġjaw f’din iż-żona ħallsux tariffi għall-ispazji tal-irmiġġ, u lil min intefgħu dawn il-ħlasijiet.
Lil Transport Malta, Momentum talab informazzjoni dettaljata dwar min hu s-sid legali u/jew l-operatur tal-faċilitajiet ta’ irmiġġ quddiem il-kampus tal-AUM, kif ukoll in-numru ta’ spazji awtorizzati uffiċjalment mill-awtorità. Il-partit talab ukoll dettalji dwar id-dati tal-ħruġ u t-tul ta’ kwalunkwe liċenzja jew permess, kif ukoll dwar spezzjonijiet, avviżi ta’ infurzar jew azzjonijiet meħuda kontra irmiġġi mhux awtorizzati. Barra minn hekk, Momentum staqsa dwar pjani jew applikazzjonijiet kurrenti marbuta mar-regolarizzazzjoni, l-espansjoni jew il-modifika ta’ dawn il-faċilitajiet tul il-waterfront ta’ Bormla.
Momentum ressaq ukoll mistoqsijiet diretti lill-American University of Malta dwar l-irwol tagħha f’dawn il-faċilitajiet. Fost oħrajn, il-partit ried ikun jaf jekk l-AUM hijiex is-sid,tmexxi jew topera l-marina jew l-ispazji ta’ irmiġġ, inkluż il-baħar u l-ispazju tal-ajru adjaċenti għall-kampus tagħha. Il-partit talab ukoll informazzjoni dwar in-numru ta’ spazji ta’ irmiġġ li bħalissa qed jintużaw u jekk dawn humiex awtorizzati minn Transport Malta, kif ukoll dwar kwalunkwe ħlasijiet riċevuti, korrispondenza, spezzjonijiet jew avviżi ta’ infurzar relatati.
Il-partit staqsa wkoll jekk l-AUM hijiex konxja ta’ xi irmiġġi mhux awtorizzati u x’azzjonijiet ittieħdu biex dawn jiġu indirizzati, kif ukoll jekk hemmx proposti kurrenti jew ippjanati għall-istabbiliment jew l-espansjoni ta’ faċilitajiet ta’ irmiġġ fiż-żona.
Fi stqarrija, Dr Matthew Agius qal li, filwaqt li l-AUM topera bħala entità kummerċjali leġittima, l-art u l-waterfront tal-madwar ġew trasferiti mill-Istat u l-liġijiet dwar id-dominju pubbliku jiggarantixxu aċċess pubbliku għall-foreshore. Huwa saħaq li għalhekk it-trasparenza u r-responsabbiltà huma essenzjali, u li kjarifika dwar dawn il-kwistjonijiet hija fl-interess pubbliku kif ukoll biex jiġi żgurat li l-isem tal-AUM ma jkunx assoċjat b’mod inġust ma’ allegati irregolaritajiet.
Momentum qal li qed jistenna tweġibiet uffiċjali mingħand Transport Malta u l-American University of Malta, filwaqt li tenna l-impenn tiegħu biex jipproteġi l-aċċess pubbliku u t-trasparenza tul il-waterfront ta’ Bormla.
