Il-Kummissjoni Ewropea sa ċerta punt ħaslet idejha mill-kwistjoni ta' donazzjoni tad-demm minn persuni LGBTIQ fl-Unjoni Ewropea hekk kif iddeċidiet dwar petizzjoni li tressqet quddiem il-Parlament Ewropew minn Martin Vooder, Estonjan.
Huwa qal f'din il-petizzjoni li l-Gvern Estonjan qed jisħaq illi persuni LGBTIQ jastjenu mis-sess sena qabel ma jiġu biex ikunu jistgħu jagħtu d-demm. Il-Gvern Estonjan qal li peress li l-komunità LGBTIQ hija grupp ta' "riskju għoli" u allura hemm bżonn ta' skrutinju akbar. Vooder qal illi riċerka li saret fl-Estonja turi illi fost persuni eterosesswali ir-riskju jikber b'10 darbiet u allura jisħaq illi mhux ġust u validu li jiġu imposti tali restrizzjonijiet.
Huwa jisħaq illi r-riskju sesswali qatt ma għandu jkun determinat mill-preferenzi sesswali imma mill-personalità tal-persuni u l-attività sesswali tiegħu.
Il-Kummissjoni qalet illi filwaqt li tifhem li Stati Membri differenti għandhom kriterji differenti nkluż diferimenti għal għoti tad-demm ta' persuni meqjusin aktar sesswalment riskjużi, tinnota illi f'dan ir-rispett hemm differenza bejn "imġieba sesswali" u "orjentazzjoni sesswali" u tfakkar li dawn mhumiex identiċi.
Pero' l-Kummissjoni innutat ukoll f'rispons għal din il-petizzjoni li porzjon sinjifikanti ta' nies li kienu pożittivi għall-HIV kienu rġiel li kellhom kuntatt sesswali ma' rġiel oħrajn u qalet ukoll illi "ir-rotta predominanti ta' każi jitrattaw irġiel li jkollhom x'jaqsmu ma' irġiel oħra - jew 53% tal-każi. Qalet ukoll li fil-każi ta' Ċipru, l-Ungerija, l-Iżlanda, l-Olanda, il-Polonja u l-Islovakkja dan il-persentaġġ tela' għal aktar minn 60%.
Tfakkar illi l-kriterji differenti li jagħmlu stati membri differenti biex ikunu ċerti li l-proċess ikun sigur u jista' jieħu l-forma ta' ttestjar, anke b'teknoloġiji partikolari biex is-sigurtà tkun dejjem aċċertata.
Il-Kummissjoni innutat illi fl-aħħar snin Stati Membri għamlu evalwazzjoni mill-ġdid tal-proċess ta' diferiment ta' għoti tad-demm u naqqsu l-perjodu għal tliet xhur sa sena. Tfakkar illi Stati Membri għandhom jaslu għall-konklużjonjiet finali dwar perjodu illi fih persuna trid tkun astjeniet mis-sess wara "li jieħdu f'kunsderazzjoni l-għarfien mediku, xjentifiku u epidemjoloġiku kif ukoll wara li kull mezzi oħrajn xjentifiċi jkunu analizzati wkoll."
Il-Kummissjoni għalhekk iddeċidiet li pajjiż jista' jagħmel żmien ta' diferiment u allura restrizzjonijiet simili bħal dawk fl-Estonja u tisħaq li dawn jafu jkunu ġustifikati, quddiem in-numri ta' każi f'numru ta' pajjiżi.
"Il-Kummissjoni Ewropea mhix f'pożizzjoni li tiddeċiedi hi l-kriterji ta' diferiment ibbażat fuq imġieba sesswalment riskjuża hekk kif l-implimentazzjoni tad-Direttiva tiddefinixxi illi huwa l-Istat Membru li għandu jiddeċiedi skont informazzjoni xjentifika u epidemoloġika lokali," qalet l-istess Kummissjoni.
Hija tgħid ukoll illi kull trattament differenti dwar l-għoti tad-demm "għandha tkun mibnija skont evidenza xjentifika" u tinkoraġġixxi għalhekk aktar studji u informazzjoni dwar mard simili. Tappella wkoll biex fejn possibbli Stati Membri japplikaw restrizzjonijiet f'dan il-proċess skont l-imġieba ta' persuna.
X'qalet il-Qorti Ewropea tal-Ġustizzja?
Lura fid-29 ta' April 2009, tabib mill-Aġenzija Franċiża tal-Għoti tad-Demm irrifjuta li jagħti d-demm lil raġel fuq il-bażi tal-fatt li dan kien omosesswali u li l-liġi Franċiża kienet teskludi irġiel li kellhom kuntatti sesswali ma' irġiel oħrajn. Ir-raġel in kwistjoni kien sfida d-deċiżjoni u staqsa lill-Qorti Ewropea tal-Ġustizzja sabiex tara dan hux kompatibbli mad-Direttivi Ewropej fuq is-suġġett.
Id-direttiva tgħid li persuni li l-imġieba sesswali tagħhom tpoġġiehom f'riskju għoli li jkollhom mard trażmess sesswalment, għandhom ikunu esklużi mill-proċess ta' għoti tad-demm.
L-Avukat Ġenerali Paolo Mengozzi kien qal iżda illi l-fatt li raġel ikollu x'jaqsam ma' ieħor ma għandux jiġi meqjus bħala imġieba sesswali li tipprekludih milli jagħti d-demm.
Huwa qal li għalhekk "imġieba sesswali" għandha tkun definita bħala prattika sesswali ta' nies differenti u individwali.
Għalhekk minn dan il-lat il-fatt li raġel kellu x'jaqsam ma' raġel ma għandux iwaqqaf persuna milli tagħti d-demm.
Megnozzi qal illi l-libertà tal-Istati Membri tispiċċa l-mument li d-drittijiet u l-liberatjiet fundamentali jiġu mhedda.