Abigail Camilleri tħabbar it-tmiem tal-karriera politika tagħha wara l-elezzjoni

L-eks deputata tal-Partit Laburista Abigail Camilleri ħabbret li qed tagħlaq il-kapitlu politiku tagħha wara li naqset milli terġa’ tiġi eletta fl-elezzjoni ġenerali tal-2026.

F’messaġġ li ppubblikat fuq il-midja soċjali, Camilleri rringrazzjat lil dawk kollha li appoġġjawha matul il-vjaġġ politiku tagħha, filwaqt li qalet li qed tħares lura lejn l-esperjenza tagħha b’sens ta’ sodisfazzjon u ’l quddiem b’serenità.

Camilleri kienet waħda mis-sitt kandidati Laburisti li daħlu fil-Parlament fl-2022 permezz tal-mekkaniżmu korrettiv tal-ġeneru. Dakinhar hija kienet kisbet 394 vot tal-ewwel preferenza.

Fl-elezzjoni tal-2026 hija żiedet l-appoġġ elettorali tagħha, hekk kif kisbet 482 vot tal-ewwel għadd, iżda dan ma kienx biżżejjed biex terġa’ tikseb siġġu parlamentari.

Matul iż-żmien tagħha fil-Parlament, Camilleri serviet fuq diversi kumitati parlamentari, fosthom dawk tal-edukazzjoni u l-petizzjonijiet, kif ukoll il-kumitat permanenti dwar l-informatika u l-intelliġenza artifiċjali.

Hija kienet ukoll president tal-Kumitat għall-Affarijiet ta’ Għawdex, rwol li okkupat matul il-leġiżlatura li għaddiet.

Bit-tħabbira tagħha, Camilleri ssir waħda mill-ewwel eks deputati li kkonfermat pubblikament li mhux se tkompli bil-karriera politika tagħha wara r-riżultat tal-elezzjoni ġenerali.