Turnout elettorali jilħaq it-87.42%; l-ogħla parteċipazzjoni fis-7 Distrett, l-inqas fit-12-il Distrett

Skont l-istatistika provduta mill-Assistenti Kummissjonarji Elettorali fl-għeluq tal-votazzjoni, l-ogħla turnout ġie rreġistrat fis-7 Distrett b’89.73%, segwit mill-5 Distrett b’89.48% u t-13-il Distrett b’89.43%.

Min-naħa l-oħra, l-inqas turnout ġie rreġistrat fit-12-il Distrett b’81.39%, segwit mill-10 Distrett b’82.58% u d-9 Distrett b’85.47%.

Id-distretti kollha l-oħra rreġistraw turnout li qabeż is-87%, b’parteċipazzjoni partikolarment b’saħħitha fit-2 Distrett (88.87%), is-6 Distrett (88.89%) u r-4 Distrett (88.69%).

Wara l-għeluq tal-votazzjoni fl-10pm, il-kaxxi tal-voti bdew jiġu ttrasportati lejn is-sala tal-għadd tan-Naxxar, fejn matul il-lejl beda l-proċess preparatorju qabel l-għadd uffiċjali tal-voti.

L-ewwel kaxxi li waslu fis-sala tal-għadd kienu dawk tal-Imdina, filwaqt li uffiċjali elettorali wettqu l-proċeduri meħtieġa ta’ verifika u siġillar qabel it-trasport tagħhom.

L-għadd tal-voti mistenni jibda matul il-jum tal-ħadd hekk kif il-Kummissjoni Elettorali tibda tipproċessa r-riżultati uffiċjali tal-elezzjoni.