Il-Partit Nazzjonalista għalaq uffiċjalment il-kampanja elettorali tiegħu b’mass meeting fil-Luxol Grounds, fejn eluf ta’ partitarji nġabru biex jisimgħu lill-Kap tal-PN Alex Borg jindirizzahom jumejn biss qabel il-votazzjoni tas-Sibt.
Borg tela’ fuq il-palk flimkien mas-sieħba tiegħu Sarah Bajada fost ċapċip qawwi u għajjat ta’ “Nazzjonalisti” mill-folla preżenti.
Fl-ewwel kliem tiegħu, Borg qal li l-PN mexxa kampanja “pożittiva”, iffukata fuq il-kwalità tal-ħajja u fuq kif jinbena pajjiż aktar reżiljenti.
Il-Kap tal-Oppożizzjoni għamel referenza partikolari għall-“middle class li taħdem iebes”, u qal li ħafna nies ħadmu, ħallsu t-taxxi u għamlu sagrifiċċji iżda fl-aħħar snin ħassewhom “mgħaffġa”.
“Lil dawn in-nies irridu nagħtuhom bidu ġdid,” qal Borg.
“Hemm bżonn nagħmlu l-ħolma tagħhom il-viżjoni tagħna.”
Borg irrefera wkoll għal persuni vulnerabbli u dawk bi dħul baxx, u qal li Gvern Nazzjonalista jrid jimxi “pass pass” magħhom.
“Ma rridx infalli persuna waħda,” qal il-Kap tal-PN.
Huwa żied li l-impenn tiegħu lejn dawn in-nies “mhuwiex miktub fil-programm elettorali imma mnaqqax f’qalbi”.
“Nixtieq li persuni vulnerabbli, persuni b’diżabilità u dawk bi dħul baxx jgħixu b’dinjità,” qal Borg.
Matul id-diskors tiegħu, il-Kap tal-PN attakka wkoll lill-Gvern fuq dak li sejjaħ “l-użu tal-poter” waqt il-kampanja elettorali.
Borg semma ċ-ċekkijiet li ntbagħtu matul il-kampanja bħala eżempju ta’ dan, iżda talab lill-partitarji biex ma jweġbux b’għajjat jew booing.
“Tibbuwjawx,” qal lill-folla.
“Fit-30 ta’ Mejju oħorġu u vvutaw.”
Borg qal li fil-kamra tal-votazzjoni ħadd ma jista’ jgħid lill-votant kif għandu jivvota.
“L-ebda partit, kandidat jew min iħaddmek ma jista’ jgħidlek kif tivvota,” sostna Borg.
“Fil-kamra tal-vot tkun waħdek… waħdek mal-kuxjenza tiegħek.”
Il-Kap tal-PN qal li biss vot lill-Partit Nazzjonalista jista’ jsolvi “l-kaos” li, skont hu, ħoloq il-Gvern Laburista.
“Min ħoloq il-kaos ma jistax isolvi l-kaos,” qal Borg.
“Dan il-pajjiż għandu bżonn bidu ġdid.”
Borg akkuża wkoll lill-Gvern li tilef “is-sens ta’ x’inhu tajjeb u x’inhu ħażin”.
Huwa semma lill-Prim Ministru Robert Abela u qal li dan ammetta li ltaqa’ ma’ kriminali u fuel smugglers.
“Gvern Nazzjonalista jara li kull ministru u s-sieħeb jew is-sieħba tiegħu jiddikjaraw l-assi tagħhom,” qal Borg, hekk kif ipprova jagħmel kuntrast bejn amministrazzjoni Nazzjonalista ġdida u l-Gvern Laburista attwali.
Wieħed mill-aktar mumenti emozzjonanti tal-lejla wasal meta Borg irringrazzja lill-familja tiegħu u indirizza lil missieru mejjet.
“Pa, nittama li għamiltok kburi bija,” qal Borg waqt li ħares lejn is-sema bid-dmugħ f’għajnejh.
“Kompli ħares fuqi biex inkompli naqdi lil Malta u Għawdex li tant inħobb.”
Bħalma għamel f’attivitajiet oħra tal-kampanja, Borg indirizza wkoll lil dawk in-Nazzjonalisti li fil-passat ħassewhom imweġġgħin b’deċiżjonijiet meħuda minn amministrazzjonijiet preċedenti tal-PN.
“Niskuża ruħi, anke jekk ma kontx hemm,” qal Borg.
“Illum għandna opportunità tad-deheb biex nivvutaw għall-bidla.”
Il-Kap tal-PN sostna li din hija “opportunità ta’ darba” biex il-pajjiż jiftaħ paġna ġdida.
Skont hu, il-“periti” ta’ dan il-kapitlu ġdid għandhom ikunu ż-żgħażagħ, l-anzjani, il-Maltin u l-Għawdxin “ta’ rieda tajba”.
