Robert Abela jsejjaħ għall-“aħħar qadfa” fil-Fosos hekk kif il-PL jagħlaq il-kampanja elettorali

Il-Prim Ministru Robert Abela appella lill-elettorat biex jagħtih “mill-ġdid il-privileġġ” li jmexxi lill-pajjiż, hekk kif il-Partit Laburista għalaq il-kampanja elettorali tiegħu b’mass meeting fil-Fosos tal-Floriana.

F’diskors emozzjonanti u mimli referenzi personali, Abela qal li l-Partit Laburista huwa “garanzija ta’ direzzjoni ċara” mibnija fuq “l-aktar ekonomija b’saħħitha fl-Ewropa”.

“Ftit sigħat oħra biss u intom se tagħtu l-ġudizzju tagħkom,” qal Abela lill-folla.

“Se tagħżlu x’tip ta’ futur tridu għalikom, għal uliedkom u għal pajjiżkom.”

Matul id-diskors tiegħu, il-Prim Ministru saħaq fuq il-kunċett ta’ kwalità tal-ħajja u qal li l-Gvern Laburista mhux biss se jkompli jsaħħaħ l-ekonomija, iżda wkoll “ikun magħkom aktar minn qatt qabel”.

Abela għamel diversi referenzi għal kategoriji differenti tas-soċjetà — fosthom żgħażagħ, pensjonanti, familji, persuni b’diżabilità u Għawdxin — filwaqt li saħaq li “Malta hija intom”.

Il-Prim Ministru qal li l-pajjiż illum jista’ joffri aktar sostenn minn qatt qabel grazzi għall-istabbiltà ekonomika.

Huwa sostna li l-Gvern Laburista rnexxielu jmexxi lill-pajjiż fost “maltempati kbar”, fosthom il-pandemija u l-instabbiltà internazzjonali.

“L-inkwiet ħalluh għalija u għal sħabi — dak xogħolna,” qal Abela.

“Jien magħmul differenti. Qatt ma qtajt qalbi.”

F’mument ieħor emozzjonanti, il-Prim Ministru tkellem dwar koppji li saru ġenituri permezz tal-IVF, filwaqt li rrakkonta kif waqt attività f’Għawdex omm tatu tarbija f’idejh u qaltlu: “Dik bis-saħħa tiegħek.”

Abela qal li dawn ir-riformi setgħu jsiru biss “grazzi għall-fiduċja” tal-poplu.

Il-Prim Ministru ammetta wkoll li kien hemm mumenti fejn il-Gvern seta’ ħa deċiżjonijiet aħjar.

“Perfetti m’aħniex u qatt mhu se nkunu,” qal Abela.

“Fejn inqasnikom, nerfagħha kollha fuqi u niskuża ruħi magħkom.”

Lejn tmiem id-diskors tiegħu, Abela talab lill-votanti biex “ma jħallux lil ħaddieħor jieħu d-deċiżjoni għalihom” u appella lil dawk li għadhom ma ġabrux il-vot biex jagħmlu dan qabel ma jkun tard wisq.

Ritratt: Daniel Tihn

“Fija se ssibu kaptan sod,” qal il-Prim Ministru.

“B’aktar enerġija mill-ewwel ġurnata u b’team mimli ħiliet.”

Il-mass meeting kien indirizzat ukoll mid-Deputat Mexxej tal-PL Alex Agius Saliba, li sejjaħ lill-partitarji “l-pedament sod” tal-moviment Laburista.

Agius Saliba qal li l-elezzjoni tas-Sibt hija waħda “storika”, hekk kif il-PL qed jipprova jirbaħ ir-raba’ elezzjoni konsekuttiva — xi ħaġa li qal “qatt ma ġrat qabel” fil-politika Maltija.

Huwa sostna li l-għażla quddiem il-votanti hija waħda bejn “kredibilità, stabbiltà u kompetenza” minn naħa tal-PL, u “konfużjoni” min-naħa tal-PN.

F’attakk dirett lejn il-Kap tal-Oppożizzjoni Alex Borg, Agius Saliba qal li dan “ma jafx ix-xellug mil-lemin” u akkużah li gideb dwar il-vot tiegħu fuq l-IVF.

“Jekk illum jigdeb quddiemkom, immaġinaw x’jagħmel it-Tnejn bħala Prim Ministru,” qal Agius Saliba.

Id-Deputat Prim Ministru Ian Borg ukoll indirizza lill-folla u qal li l-Partit Laburista baqa’ “moviment li ma jarmi lil ħadd”.

Borg fakkar fis-7 ta’ Marzu tal-2013 meta, jumejn qabel l-elezzjoni, Joseph Muscat kien wiegħed futur ġdid lil pajjiż.

“Dak li wegħedna wettaqnieh,” qal Ian Borg.

“Hloqna ekonomija reżiljenti u tajna futur aħjar liż-żgħażagħ.”

Id-Deputat Prim Ministru qal ukoll li l-għażla tas-Sibt mhijiex “esperiment”, iżda deċiżjoni dwar min għandu jmexxi lill-pajjiż.

“Malta ma tistax tilgħab man-nar,” sostna Borg.

Waħda mill-aktar sorpriżi tal-lejla kienet l-intervent ta’ Lydia Abela, li introduċiet lill-Prim Ministru b’diskors personali dwar il-bidu tar-relazzjoni tagħhom.

Ritratt: Daniel Tihn

Lydia rrakkontat kif fl-1996, waqt mass meeting ieħor fil-Fosos, Robert Abela staqsieha jekk riditx taqbeż barrier biex tmur ħdejh.

“Tajtu idejja u minn dakinhar ma telaqlix,” qalet Lydia fost ċapċip kbir mill-folla.

Hija ddeskriviet lil Robert Abela bħala “r-raġel li għallimni x’inhi l-vera mħabba” u qalet li minkejja l-kariga ta’ Prim Ministru, għalija “baqa’ l-istess Robert”.

“Malta tarak bħala Prim Ministru, imma jiena narak bħala r-raġel li qabadli idi 30 sena ilu,” qalet Lydia.

Il-mass meeting intemm b’appell mill-Partit Laburista sabiex il-partitarji joħorġu jivvutaw lill-“kandidati kollha tal-Labour”.