L-aħħar dibattitu televiżiv qabel il-ġurnata tas-skiet elettorali kien ikkaratterizzat minn skambju ta’ attakki bejn il-Partit Laburista u l-Partit Nazzjonalista dwar il-kredibilità, l-esperjenza u l-ħtieġa ta’ bidla fil-pajjiż.
Il-programm Xtra fuq TVM, immexxi minn Saviour Balzan, laqqa’ flimkien lid-Deputat Prim Ministru Ian Borg u lill-Ministru Jonathan Attard għall-Partit Laburista, filwaqt li Darren Carabott u Conrad Borg Manche rrappreżentaw lill-Partit Nazzjonalista.
Matul id-dibattitu, Ian Borg appella lill-votanti kollha biex “jagħmlu l-parti tagħhom” fl-elezzjoni tas-Sibt.
“Is-surveys qed jgħiduli biss ħaġa waħda — li ħadd m’għandu jieħu xejn for granted,” qal Borg.
Il-PL kompla jisħaq fuq l-esperjenza tiegħu fit-tmexxija tal-pajjiż, bil-messaġġ ċentrali jibqa’ dak tal-“kredibilità” u l-istabbiltà.
Min-naħa tiegħu, Darren Carabott ikkritika l-interruzzjonijiet kontinwi waqt il-programm u qal li dawn juru ċar kif iż-żewġ naħat jaraw il-politika.
Carabott sostna li l-PN għandu diversi proposti konkreti biex jinħolqu aktar fondi għall-pajjiż u biex jingħata aktar appoġġ lill-familji.
Jonathan Attard qal li l-Partit Laburista introduċa “dimensjoni ġdida” fil-proposti tiegħu permezz tal-wellbeing index.
Skont hu, dan l-indikatur għandu jkejjel kif il-proposti politiċi jaffettwaw il-benesseri taċ-ċittadini u mhux biss iċ-ċifri ekonomiċi.
Waħda mill-aktar mumenti intensi tad-dibattitu seħħet meta Conrad Borg Manche ġie mistoqsi minn Saviour Balzan għaliex iddeċieda jingħaqad mal-PN wara li serva bħala sindku tal-Gżira mal-Partit Laburista.
Borg Manche qal li waħda mir-raġunijiet kienet il-mod kif il-Gvern Laburista falla milli jwettaq wegħdiet relatati mal-Qorti tal-Familja.
Dan wassal għal skambju argumentattiv mal-Ministru Jonathan Attard, li ċaħad bil-qawwa l-akkużi.
Matul id-dibattitu, kandidati tal-PN fakkru wkoll lill-kontropartijiet Laburisti tagħhom li qabel l-2013 ħafna mill-membri tal-Gvern Laburista lanqas huma ma kellhom esperjenza ministerjali.
Il-kumment deher bħala risposta diretta għall-attakki tal-PL fuq in-nuqqas ta’ esperjenza tal-Kap tal-PN Alex Borg.
Fl-għeluq tad-diskussjoni, Ian Borg qal li l-Partit Laburista qed jitlob ir-raba’ mandat mhux “b’kapriċċ”, iżda għax jemmen li għandu l-aqwa tim biex imexxi lill-pajjiż u jwettaq proġetti ambizzjużi.
Min-naħa tiegħu, Darren Carabott sostna li Alex Borg irnexxielu fi żmien qasir “jerġa’ jagħti ħajja ġdida” lill-Partit Nazzjonalista u jippreżentah bħala alternattiva kredibbli għall-Gvern Laburista.
U hekk kif il-kampanja issa daħlet uffiċjalment fl-aħħar sigħat tagħha, id-dibattitu finali reġa’ wera l-akbar argument ta’ din l-elezzjoni — bejn min qed jgħid li għandu l-esperjenza biex ikompli jmexxi, u min qed jinsisti li wasal iż-żmien għal bidla.
