Il-Kummissjoni Elettorali tappella biex pazjenti l-isptar jingħataw id-dokumenti tal-vot tagħhom

Il-Kummissjoni Elettorali appellat lill-qraba ta’ votanti rikoverati fl-isptarijiet biex jgħaddu d-dokumenti tal-vot lill-pazjenti sabiex dawn ikunu jistgħu jivvutaw nhar il-Ħamis.

Il-Kummissjoni fakkret li persuni li kienu reġistrati bħala pazjenti sal-25 ta’ Mejju fis-6pm iridu jkollhom id-dokument tal-vot tagħhom fil-pussess tagħhom biex ikunu jistgħu jivvutaw waqt il-votazzjoni fl-isptarijiet.

Dan japplika għal pazjenti rikoverati fl-Isptar Mater Dei, inkluż SAMOC, Karen Grech, Mount Carmel u l-Isptar Ġenerali ta’ Għawdex.

Fi stqarrija, il-Kummissjoni Elettorali wissiet li kull min iżomm dokument tal-vot ta’ persuna oħra jkun effettivament qed iċaħħad lil dik il-persuna mid-dritt tagħha tal-vot, bi ksur tal-liġi.

Il-Kummissjoni qalet li jekk jinqalgħu każijiet bħal dawn, il-pulizija se jiġu kkuntattjati biex jintervjenu.

Intant, il-Kummissjoni ħabbret ukoll li nhar il-Ħamis, meta l-pazjenti jkunu qed jivvutaw, il-viżitaturi mhux se jitħallew jidħlu fl-isptarijiet.

L-unika eċċezzjoni se tkun għal qraba ta’ pazjenti li jinsabu f’kundizzjoni serja ħafna.