Il-Kap tal-Partit Nazzjonalista Alex Borg qal li lest jirriżenja jekk Gvern immexxi minnu ma jwettaqx il-proġett tal-mass rapid transport propost mill-PN.
Borg kien qed jitkellem waqt il-programm Il-Każin, li oriġinarjament kien ippjanat bħala dibattitu bejn iż-żewġ mexxejja, iżda li għalih il-Prim Ministru Robert Abela ma attendiex.
Matul il-programm, Borg iddefenda l-proposta tal-Partit Nazzjonalista għal sistema moderna ta’ mass transport taħt l-art u qal li għandu fiduċja sħiħa kemm fil-pjan kif ukoll fit-tim ta’ esperti li ħadem fuqu.
“Jekk ma nwasslux dan il-proġett, nirriżenja,” qal Borg waqt il-programm.
Il-ġimgħa li għaddiet, il-PN nieda uffiċjalment il-pjan tiegħu għal sistema ta’ mass rapid transport li fil-parti l-kbira tagħha tkun taħt l-art.
L-ewwel linja proposta tkun twila 11.5 kilometru u tgħaddi mill-aktar żoni urbani densament popolati fil-pajjiż, b’konnessjonijiet bejn l-Ajruport, Santa Venera, Ħal Qormi, iż-żona tal-Università, il-Gżira, Tas-Sliema, San Ġiljan u Pembroke.
Skont il-proposta, il-ferroviji jkunu qed joperaw bi frekwenza ta’ madwar tmien vjaġġi fis-siegħa, jiġifieri kull seba’ minuti taħt kundizzjonijiet normali.
Borg ammetta li hemm min għandu dubji dwar jekk il-proġett jistax jitwettaq fi żmien ħames snin, iżda sostna li l-pjan huwa realistiku u fattibbli.
Huwa qal li l-PN qed jippreżenta proposta mibnija fuq studji, ippjanar u costing dettaljat.
Matul il-programm, Borg qal ukoll li l-manifest elettorali tal-Partit Nazzjonalista huwa kkalkulat li jiswa madwar €6.7 biljun.
Dwar il-finanzjament tal-partiti, il-Kap tal-Oppożizzjoni qal li d-dejn tal-PN bħalissa jlaħħaq madwar €32 miljun, bil-maġġoranza tiegħu marbuta mal-media arm tal-partit.
Huwa qal li Gvern Nazzjonalista jkun qed jimbotta riforma kostituzzjonali sabiex jinbidlu l-liġijiet relatati mal-finanzjament tal-partiti politiċi.
Borg wiegħed ukoll aktar trasparenza u regoli aktar stretti kemm għall-partiti politiċi kif ukoll għas-sussidjarji tagħhom.
