Il-Prim Ministru Robert Abela qal li “ftit għażliet ħżiena jistgħu jeqirdu l-progress kollu” hekk kif appella lill-votanti biex ma jieħdu xejn bħala garantit waqt attività politika fiż-Żabbar.
“Fhimuni meta ngħidilkom biex ma tieħdu xejn for granted,” qal Abela. “Jekk tridu żżommu dak li għandkom, agħtu l-fiduċja tagħkom lil min verament jarakom bħala prijorità.”
Matul id-diskors tiegħu, Abela sostna li l-Partit Laburista rnexxielu jibni “l-aktar ekonomija b’saħħitha fl-Ewropa” minkejja diversi sfidi internazzjonali li affettwaw pajjiżi oħra.
“Hemm mumenti diffiċli fejn wieħed jista’ jaqta’ qalbu, imma jien qatt ma qtajt qalbi u sakemm ikolli lilkom warajja qatt mhu se nagħmel hekk,” qal il-Prim Ministru lill-partitarji miġbura fiż-Żabbar.
Abela qal ukoll li l-manifest elettorali tal-Partit Laburista kien “miktub min-nies” u mibni fuq il-bżonnijiet tal-familji Maltin u Għawdxin.
F’attakk dirett lejn il-Partit Nazzjonalista, Abela sostna li l-manifest tal-PN “inkiteb minn chatbot tal-AI”, filwaqt li qal li Alex Borg “issa qed jagħti t-tort lill-chatbot kull darba li jinqabad jagħmel żball”.
Il-Prim Ministru qal li l-poplu għadu jiftakar żmien fejn aġenziji internazzjonali kienu jnaqqsu l-credit ratings ta’ Malta taħt amministrazzjonijiet Nazzjonalisti, piż li skont hu spiċċa nġarr mill-familji Maltin.
Matul l-attività, Abela reġa’ semma diversi wegħdi elettorali tal-Partit Laburista fosthom il-€1,000 super bonus annwali, culture pass għaż-żgħażagħ u estensjoni tal-iskema għall-first-time buyers.
Huwa sostna wkoll li filwaqt li taħt Gvern Nazzjonalista l-pensjonijiet kienu “ffriżati”, il-Partit Laburista issa qed iwiegħed żieda minima ta’ €50 fil-ġimgħa fil-pensjonijiet.
Dwar l-IVF, Abela qal li fil-manifest tal-Partit Nazzjonalista “ma hemm lanqas paġna waħda” ddedikata għas-suġġett, filwaqt li sostna li Gvern Laburista baqa’ jimbotta ’l quddiem riformi favur il-familji.
Lejn tmiem id-diskors tiegħu, Abela wissa lill-partitarji biex ma jħallux surveys jew projections jinfluwenzawhom.
“L-elezzjonijiet ma jintrebħux bis-surveys iżda bil-voti,” qal Abela, hekk kif sejjaħ din l-elezzjoni bħala waħda mill-aktar diffiċli li qatt affronta l-Partit Laburista.
Huwa qal li kull elezzjoni “tibda minn żero” u appella lil dawk li diġà ddeċidew kif se jivvutaw biex jikkonvinċu lil oħrajn jagħmlu l-istess.
“Morru vvutaw kmieni s-Sibt, morru mal-familja tagħkom u mal-ħbieb tagħkom,” qal Abela fl-għeluq tad-diskors tiegħu.
L-attività kienet indirizzata wkoll mill-kandidati Laburisti Omar Farrugia, Malcolm Paul Agius Galea u Miriam Dalli.
