ARA|Il-voti jibdew jingħaddu mid-9am tal-Ħadd hekk kif il-Kummissjoni Elettorali tlesti l-preparamenti fin-Naxxar

Il-proċess tal-għadd tal-voti għall-elezzjoni ġenerali tal-2026 se jibda uffiċjalment fid-9am tal-Ħadd fil-Counting Hall fin-Naxxar, hekk kif il-Kummissjoni Elettorali qed tlesti l-aħħar preparamenti qabel il-jum tal-għadd.

F’kummenti lil gazzetta oħt, MaltaToday, il-Kummissarju Elettorali Ewlieni Joseph Camilleri qal li Malta għandha total ta’ 356,832 votant eliġibbli għal din l-elezzjoni.

Minn dawn, 334,481 persuna diġà ġabru d-dokument tal-vot tagħhom, filwaqt li għad fadal madwar 22,333 dokument li għadhom ma nġabrux.

Camilleri qal ukoll li għal din l-elezzjoni hemm 18,622 votant ġdid irreġistrat.

Huwa spjega li l-aġenti tal-partiti jridu jkunu fil-pożizzjoni tagħhom ħdejn il-perspex screens sat-8:45am tal-Ħadd, qabel ma jibda l-proċess ta’ scanning u verifika tal-voti.

Skont Camilleri, ir-riżultat mhux uffiċjali tal-elezzjoni għandu jibda joħroġ bejn siegħa u sagħtejn wara li jibda l-proċess tal-għadd, hekk kif il-partiti politiċi jibdew jieħdu kampjuni biex jipproġettaw ir-riżultat.

Voti kontestati se jiġu eżaminati minn rappreżentanti tal-Kummissjoni Elettorali flimkien ma’ rappreżentant wieħed minn kull partit.

Il-Kummissjoni qed tistenna li s-sistema tagħti l-għadd finali madwar it-8pm tal-Ħadd, u wara l-Partit Laburista u l-Partit Nazzjonalista jkollhom erba’ sigħat biex jivverifikaw ir-riżultati mas-sistemi tagħhom qabel ma ssir id-dikjarazzjoni uffiċjali.

Ir-riżultat uffiċjali se jitħabbar mill-Kummissjoni Elettorali, għalkemm il-partiti jistgħu joħorġu l-projezzjonijiet tagħhom qabel.

Camilleri qal ukoll li membri tal-pulizija u tal-Forzi Armati se jkunu preżenti ġewwa u barra l-Counting Hall biex jipprovdu sigurtà matul il-proċess kollu.

Il-kaxxi tal-voti se jibdew jaslu fin-Naxxar wara li jagħlqu l-votazzjonijiet is-Sibt fl-10pm, bil-Kummissjoni tistenna li l-kaxxi kollha jaslu sal-1am u jinfetħu kollha sal-5am.

Il-Kummissjoni mistennija toħroġ ukoll ċifri aġġornati dwar il-turnout bejn l-4pm u l-5pm tal-Ħadd.

Camilleri qal li s’issa l-proċess elettorali mexa “b’mod tajjeb ħafna” u sostna li ma huma mistennija ebda problemi.

B’kollox ġew ippreżentati 282 kandidatura mifruxa fuq 163 distrett elettorali, filwaqt li se jintużaw 852 kaxxa tal-voti.

Aktar minn 6,000 persuna bejn assistenti u staff tal-għadd se jkunu involuti fil-proċess, apparti uffiċjali interni, membri tal-pulizija u tal-Forzi Armati.

Il-ġbir tad-dokumenti tal-vot se jibqa’ għaddej sa nhar il-Ħamis f’nofsillejl, li huwa l-aħħar skadenza biex jinġabru d-dokumenti.

Persuni li jitilfu d-dokument tal-vot jistgħu japplikaw għal wieħed speċjali mingħand il-Kummissjoni Elettorali sal-Erbgħa fid-9pm.

Il-Kummissjoni qalet ukoll li għada se jivvutaw l-Assistant Electoral Commissioners, b’6,810 persuna eliġibbli mistennija jivvutaw waqt il-votazzjoni bikrija bejn is-6am u l-10pm.

Nhar il-Ħamis, pazjenti rikoverati fl-isptarijiet se jkollhom ukoll l-opportunità jivvutaw.

Il-Ġimgħa 29 u s-Sibt 30 ta’ Mejju ġew iddikjarati bħala “silent days”, jiġifieri ma tista’ ssir l-ebda attività politika.

Il-Kummissjoni fakkret ukoll li billboards, banners u posters kollha jridu jitneħħew wara li jagħlqu l-votazzjonijiet is-Sibt fl-10pm, filwaqt li kwalunkwe materjal politiku fi żmien 50 metru minn post tal-votazzjoni jrid jitneħħa.

Fil-jum tal-votazzjoni, persuni ta’ ’l fuq minn 75 sena se jingħataw prijorità fil-kjuwijiet matul il-ġurnata kollha. Persuni bejn is-60 u l-75 sena kif ukoll persuni b’diżabilità se jingħataw prijorità bejn is-1pm u l-5pm.

Il-Kummissjoni fakkret ukoll li apparat elettroniku u ritratti mhumiex permessi ġewwa ċ-ċentri tal-votazzjoni.

Camilleri appella lill-pubbliku biex jikkopera mal-awtoritajiet u evita ġemgħat jew socialising bla bżonn qrib il-postijiet tal-votazzjoni.

Huwa spjega wkoll li jekk votant jagħmel żball fuq il-vot tiegħu, jista’ javviċina assistent sabiex il-vot jiġi kkanċellat u jinħareġ wieħed ġdid.