Il-Prim Ministru Robert Abela prova jnaqqas mill-kontroversja dwar laqgħa li kellu ma’ allegat “fuel smuggler”, fejn sostna li bħala Prim Ministru huwa għandu d-dmir li jiltaqa’ ma’ kulħadd.
Abela kien mistoqsi jekk iltaqax ma’ persuna mixlija b’ħasil ta’ flus u kuntrabandu u jekk kienx hemm xi ħadd ieħor preżenti waqt il-laqgħa.
Madankollu, il-Prim Ministru ma weġibx direttament dwar jekk kienx waħdu waqt il-laqgħa mal-persuna li s’issa għadha ma ssemmietx pubblikament.
Il-kwistjoni qamet wara li Abela stess sostna l-ġimgħa li għaddiet li l-proposta tal-Partit Nazzjonalista għal offshore fuel hub kienet ġiet ippreżentata lill-Kap tal-PN Alex Borg minn “l-akbar fuel contrabandist ta’ Malta”.
Abela kien qal li kien jaf b’dan għax l-istess persuna kienet ippreżentat proposta simili lilu, iżda hu kien warrabha minnufih.
Sa issa, Abela għadu ma żvelax min hu l-allegat kuntrabandist u lanqas ma ppreżenta provi biex isostni l-akkużi tiegħu.
Min-naħa tiegħu, Alex Borg għamel dikjarazzjoni ġuramentata fejn ċaħad li qatt iltaqa’ ma’ kriminali dwar il-proposta tal-fuel hub.
Nhar il-Ħamis, Abela prova jdawwar il-mistoqsijiet billi ffoka biss fuq il-ħasil ta’ flus u evita li jindirizza l-parti relatata mal-kuntrabandu.
“Hemm mijiet jekk mhux eluf ta’ nies li qed jiffaċċjaw akkużi ta’ ħasil ta' flus” qal Abela.
Huwa sostna li jiltaqa’ ma’ kulħadd, inklużi priġunieri, iżda qal li dak li jgħodd huwa x’jagħmel persuna wara l-laqgħa.
“Jekk xi ħadd jagħtik proposta, jiddependi jekk tagħmilhiex tiegħek jew jekk tqisx min qed jagħmilhielek u twarrabhiex immedjatament,” qal il-Prim Ministru.
Abela qal li huwa dmir tiegħu li jiltaqa’ ma’ kulħadd mingħajr diskriminazzjoni, iżda sostna li jieħu s-“safeguards” neċessarji.
Madankollu, huwa ma speċifikax liema safeguards ħa u baqa’ ma semmiex lill-persuna involuta.
Il-Prim Ministru sostna wkoll li “warrab il-preżentazzjoni aktar malajr milli damet biex ġiet ippreżentata”.
Huwa qal li dan juri d-differenza bejn min jista’ jagħraf jekk proġett huwiex fl-interess nazzjonali jew le.
Intant, nhar l-Erbgħa l-eks deputat Jason Azzopardi allega f’post fuq Facebook li l-laqgħa bejn Abela u l-allegat kuntrabandist kienet saret fil-kwartieri tal-Partit Laburista f’April u li ma kien hemm ħadd ieħor preżenti.
