ADPD ikkritikat lill-Prim Ministru Robert Abela dwar il-kummenti tiegħu relatati mal-għotja proposta ta’ €1,000 għall-ħaddiema, fejn akkużatu b’diskriminazzjoni kontra l-ħaddiema barranin.
Il-partit qal li huwa kontradittorju li ftit jiem biss wara ċ-ċelebrazzjonijiet ta’ Jum il-Ħaddiem, il-Prim Ministru “għażel b’mod konxju li jiddiskrimina bejn il-ħaddiema”, filwaqt li allega li sab loophole legali biex il-ħaddiema barranin ma jibbenefikawx mill-ħlas propost mill-Partit Laburista.
Waqt attività politika nhar il-Ħadd, Abela qal li l-iskema mhux se tapplika għall-ħaddiema barranin.
ADPD iddeskriviet dawn il-kummenti bħala “tal-mistħija” u akkużat lill-Prim Ministru li qed jiftaħar li sab skuża legali biex jeskludi lill-ħaddiema mhux Maltin mill-miżura.
Mario Mallia, kelliem ta’ ADPD u kandidat fuq it-tieni u t-tmien distrett, qal li l-lingwaġġ użat mill-Prim Ministru huwa “indinj” għall-kariga li jokkupa.
“Dan il-lingwaġġ ta’ esklużjoni intenzjonata u sistematika huwa perikoluż u inaċċettabbli, speċjalment minn Prim Ministru li jgħid li jirrappreżenta lill-hekk imsejjaħ partit tal-ħaddiema,” qal Mallia.
Huwa sostna li dak li qal Abela “jagħti aktar saħħa lill-elementi razzisti” fi ħdan il-partit tiegħu f’tentattiv biex jiġbor il-voti, filwaqt li jaqa’ f’kontradizzjoni ċara.
Mallia qal ukoll li dawn il-kummenti jirrappreżentaw pass lura għad-drittijiet tal-ħaddiema u jinjoraw il-kontribut li jagħtu l-ħaddiema barranin lill-ekonomija Maltija.
“Il-Prim Ministru jidher li nesa li parti sostanzjali mit-tkabbir ekonomiku li tant jiftaħar bih hija mibnija fuq dahar dawn il-ħaddiema, li jitħallsu 38% inqas minn ħaddiema Ewropej u Maltin,” qal Mallia.
Huwa sostna li skont kwalunkwe kriterju ta’ ġustizzja soċjali, dawn il-ħaddiema għandhom ikunu fost dawk li l-aktar għandhom bżonn appoġġ.
ADPD reġgħet appellat għal politiki li jirrispettaw lill-ħaddiema kollha bl-istess mod, irrispettivament min-nazzjonalità tagħhom.
Il-partit qal li jemmen “f’politika ta’ inklużjoni u tama aktar milli esklużjoni u mibegħda”, filwaqt li sostna li Malta għandha tibqa’ pajjiż miftuħ b’ekonomija mibnija fuq l-etika u l-ġustizzja li tiggarantixxi rispett u dinjità ugwali għall-ħaddiema kollha.
