Il-Kap tal-Partit Nazzjonalista Alex Borg staqsa għaliex il-Gvern sejjaħ elezzjoni bikrija, filwaqt li sostna li aktar ma tkompli l-kampanja elettorali, aktar qed jidher ċar li l-Partit Laburista jinsab “f’paniku” u qed jikkopja proposti tal-PN.
Waqt attività politika fil-Belt Valletta nhar it-Tnejn filgħaxija, Borg qal li gvernijiet Nazzjonalisti dejjem ħarsu fit-tul lejn il-futur tal-pajjiż u ħolqu setturi ekonomiċi li Malta għadha tibbenefika minnhom sal-lum.
“Għadna ma nafux eżatt għaliex issejħet elezzjoni bikrija,” qal Borg. “Iżda aktar ma jgħaddi ż-żmien, aktar qed nifhmu għala, għax jinsabu f’paniku. U dak il-paniku qed jidher fil-mod kif qed jikkopjaw il-proposti tagħna.”
Il-Kap tal-PN qal li l-proposti tal-partit tiegħu ġew żviluppati wara konsultazzjoni ma’ professjonisti u nies mis-soċjetà, “u mhux ma’ kuntrabandisti”.
B’dan, Borg kien qed jirreferi għall-kummenti tal-Prim Ministru Robert Abela li allega li l-proposta tal-PN dwar offshore bunkering kienet ġiet issuġġerita minn “l-akbar kuntrabandist f’Malta”, allegazzjoni li sa issa għadu ma identifikax min kienet il-persuna msemmija.
Borg appella lis-supporters biex jgħinu jxerrdu l-viżjoni tal-Partit Nazzjonalista matul il-kampanja elettorali.
L-attività politika, li kienet indirizzata wkoll mill-eks deputat Mario de Marco u l-kandidati tal-ewwel distrett tal-PN, kellha tieqaf għal ftit minuti minħabba qtugħ tad-dawl.
Matul id-diskors tiegħu, Borg ikkritika wkoll il-masterplan ta’ €1.5 biljun għall-infrastruttura tas-saħħa mħabbar mill-Gvern aktar kmieni dakinhar.
Huwa qal li n-nies “għajjenin mill-wegħdi” u jridu azzjoni konkreta.
“Oħrajn fallew fis-saħħa u llum ħarġu b’pjan ġdid. Iżda n-nies illum għajjenin bil-viżjonijiet u jridu azzjoni, u Gvern Nazzjonalista biss jista’ jwettaqha,” qal Borg.
Il-Kap tal-Oppożizzjoni rrefera wkoll għall-proposta tal-PN dwar mediċini tal-kanċer b’xejn, fejn qal li l-Partit Laburista inizjalment kien ikkritika l-idea qabel ma ħabbar proposta simili aktar kmieni nhar it-Tnejn.
Borg sostna li l-Partit Nazzjonalista mexxa kampanja pożittiva tul il-perjodu elettorali kollu, filwaqt li qal li dan huwa t-tip ta’ politika li jridu n-nies.
“Irrid politika pożittiva li tħares lejn x’nistgħu nagħmlu għall-pajjiż, politika li tgħaqqad lin-nazzjon u mhux tifirdu,” qal Borg.
