Id-Deputat Prim Ministru, Ian Borg evita li jgħid jekk il-Prim Ministru Robert Abela għandux jirrapporta lill-pulizija lill-persuna li huwa allega li hija “l-akbar kuntrabandist tal-fuel fil-pajjiż”.
Meta mistoqsi jekk Robert Abela għandux jaċċetta l-isfida tal-Kap tal-PN Alex Borg u jgħaddi l-informazzjoni lill-pulizija, Ian Borg qal li qabel xejn il-Partit Nazzjonalista għandu jidentifika min huma l-esperti wara l-proposta tal-offshore fuel hub.
Borg deher ukoll inaqqas mill-importanza tal-kontroversja, meta ddeskriva l-istorja bħala “non-story”.
“Ladarba nkunu nafu min huma, wieħed jista’ jara x’inhuma l-fatti dwar din l-istorja – jew non-story – u x’passi għandhom jittieħdu jew ittieħdu miż-żewġ naħat,” qal Borg.
Id-Deputat Prim Ministru qal li n-nies iridu jmorru lil hinn mill-allegazzjonijiet u jifhmu jekk il-proġett huwiex fattibbli u x’impatt jista’ jkollu fuq ħajjithom.
Meta reġa’ ġie mistoqsi dwar jekk il-Prim Ministru għandux jirrapporta l-każ lill-pulizija, Borg qal li hu ma kien preżenti f’ebda laqgħa bejn il-Prim Ministru u l-persuna allegata, u lanqas f’xi laqgħa mal-Kap tal-Oppożizzjoni.
Huwa reġa’ insista li qabel jagħti risposta ċara, irid ikun magħruf min huma l-esperti involuti fil-proposta.
Il-kontroversja qamet wara li Robert Abela allega li l-proposta tal-PN għal offshore bunkering facility kienet ġiet ippreżentata lill-partit minn “l-akbar kuntrabandist tal-fuel fil-pajjiż”, għalkemm ma semma l-ebda isem.
Min-naħa tiegħu, Alex Borg ċaħad dawn l-allegazzjonijiet u ppreżenta affidavit ġuramentat fejn sostna li qatt ma ltaqa’ ma’ kuntrabandist jew ma’ persuni involuti f’attività kriminali b’rabta mal-proposta tal-offshore fuel hub.
