Għadu mhux ċar jekk is-sistema proposta ta’ trasport tal-massa tal-gvern Laburista hijiex se tkun inkluża fil-manifest elettorali tal-partit.
Il-kwistjoni tqajmet meta l-Prim Ministru Robert Abela ġie mistoqsi dwar il-proġett ta’ €2.8 biljun li tħabbar ftit qabel bdiet il-kampanja elettorali. Meta ġie mistoqsi jekk dan il-proġett hux inkluż fil-kostings tal-manifest, huwa wieġeb li manifest elettorali jinkludi miżuri li jistgħu jitwettqu f’leġiżlatura waħda.
L-għada, waqt konferenza fil-kwartieri tal-Partit Laburista, il-Ministru għall-Inklużjoni Julia Farrugia ġiet mistoqsija dwar l-istess suġġett. Fir-risposta tagħha, hija ma kkonfermatx u lanqas ċaħdet jekk il-proposta hijiex parti mill-manifest, iżda indikat li d-dokument sħiħ għandu jiġi evalwat meta jiġi ppubblikat aktar tard fil-kampanja.
Farrugia kkritikat ukoll lill-Partit Nazzjonalista, u qalet li qed jippreżenta proposti konfużi dwar kif għandu jiġi indirizzat il-problema tat-traffiku.
Hija saħqet li dak li qed jitħabbar kuljum ma jirrappreżentax il-manifest kollu tal-partit.
Il-proġett propost jinkludi sistema ta’ light rail li tgħaqqad il-Belt Valletta, San Pawl il-Baħar, l-Isptar Mater Dei, Ħal Qormi u l-ajruport, u li suppost tkun operattiva fi żmien 15-il sena. Din tkun parti minn pjan usa’ li jinkludi wkoll titjib fin-netwerk tal-karozzi tal-linja u tal-ferries, kif ukoll strateġiji relatati mal-parkeġġ u mezzi alternattivi ta’ trasport bħal mixi u ċikliżmu.
Madankollu, il-proġett għadu ma rċeviex l-approvazzjonijiet kollha meħtieġa. Il-Ministru għall-Finanzi Clyde Caruanaqal li se japprovah biss jekk l-istudji ta’ fattibbiltà – li għadhom ma ġewx ippubblikati – juru li l-proġett huwa vijabbli.
Fl-istess waqt, Clyde Caruana sostna li l-manifest tal-Partit Laburista fih proposti li huma kkalkulati u fattibbli.
Qabel l-elezzjoni ġenerali tal-2022, il-gvern kien ukoll wiegħed proġett ta’ metro fuq skala kbira, li wara l-elezzjoni ma tkompliex.
