Il-kumpanija KM Malta Airlines ħabbret żieda fit-titjiriet wara domanda qawwija minn ċittadini Maltin li jixtiequ jirritornaw Malta biex jivvutaw fl-elezzjoni li ġejja.
Skont il-kumpanija, fl-ewwel jumejn tal-bookings relatati mal-elezzjoni diġà ġew irreġistrati aktar minn 1,000 passiġġier li bbukkjaw titjiriet bir-ritorn lejn Malta. Madwar 90% ta’ dawn il-bookings oriġinaw minn Brussell u Londra.
B’reazzjoni għal din id-domanda, KM Malta Airlines se toffri titjiriet addizzjonali minn Londra Gatwick u Brussell f’diversi dati bejn l-20 u l-31 ta’ Mejju. Il-kumpanija qalet ukoll li għad hemm siġġijiet disponibbli fuq dati oħra, inkluż għal dawk li jippjanaw jivvjaġġaw għal votazzjoni bikrija fit-23 ta’ Mejju u jirritornaw ftit wara.
Sadanittant, il-partit ADPD – The Green Party sejjaħ għal bidla fis-sistema tal-votazzjoni, u talab li ċ-ċittadini Maltin li jgħixu barra jingħataw id-dritt jivvutaw fl-ambaxxati Maltin.
Il-kandidat Luke Caruana qal li kull elezzjoni ġġib magħha rapporti ta’ diffikultajiet biex Maltin barra jibbukkjaw titjiriet biex jivvutaw.
F’istqarrija, il-partit ikkritika lill-gvern talli jkompli jissussidja t-titjiriet għal dan l-iskop, u ddeskriva din il-prattika bħala irresponsabbli, speċjalment fi żmien ta’ inċertezza globali.
ADPD – The Green Party ippropona li Malta tadotta sistemi użati f’pajjiżi Ewropej oħra, fejn iċ-ċittadini jistgħu jivvutaw mill-ambaxxati jew permezz ta’ mezzi elettroniċi.
Il-kap tal-partit Sandra Gauci sostniet li d-dritt tal-vot ta’ Maltin barra għandu jkun garantit permezz ta’ metodi aktar aċċessibbli u moderni.
Hija temmet tgħid li huwa inaċċettabbli li Malta tibqa’ tuża sistemi antikwati li joħolqu pressjoni bla bżonn fuq il-kapaċità tat-titjiriet, speċjalment fi żminijiet ta’ domanda għolja.
