Il-Prim Ministru Ingliż, Boris Johnson, beda t-triq tiegħu lejn l-elezzjoni ġenerali b’wiegħda ċara li joħroġ lir-Renju Unit mill-Unjoni Ewropea, waqt li kkumpara lir-rivali tiegħu, Jeremy Corbyn, ma’ Josef Stalin.
Ir-Renju Unit se jkun qed jivvota f’elezzjoni ġenerali bikrija bil-għan li l-Parlament jinqala’ mill-kriżi li spiċċa fiha wara li r-Renju Unit ivvota biex joħroġ mill-Unjoni Ewropea.
Johnson qed jibbaża l-kampanja tiegħu fuq Brexit, iżda jidher li l-Partit Konservattiv se jkun qed jagħfas fuq kwistjonijiet oħra importanti, fosthom is-Settur tas-Saħħa.
“Ma rridx elezzjoni. L-ebda Prim Ministru ma jrid elezzjoni speċjalment f’Diċembru,” saħaq Johnson. “Iżda kif inhuma l-affarijiet sempliċiment ma hemmx għaġla.”
Huwa saħaq li jekk Brexit iseħħ fil-ġimgħat li ġejjin u malajr kemm jista’ jkun, ir-Renju Unit se jkun qed jiffoka fuq il-prijoritajiet l-oħra kollha li jeħtieġ jindirizza.
Johnson mar għand ir-Reġina Eliżabetta biex il-Parlament jiġi xolt uffiċjalment, filwaqt li aktar tard se jkun qed iniedi uffiċjalment il-kampanja elettorali tal-Partit Konservattiv.