Intervista Lokali Barranin

Esther Azzopardi tirriżenja ħabta u sabta minn referee

Ta' 35 sena rtirat wara karriera ta' 19-il sena, 65 partita internazzjonali u 50 partita fil-Premier

John Busuttil / 19 ta' Jannar 2017 14:10
Il-FIFA referee Esther Azzopardi ddeċidiet ħabta u sabta li tirtita mill-karriera ta' referee b'mod immedjat. Azzopardi kkomunikat din id-deċiżjoni billi bagħtet ittra ta' riżenja lid-direttur tar-referees tal-MFA, Kevin Azzopardi. Fl-ittra ta' riżenja hi ma tat l-ebda spjegazzjoni li wasslitha li tieħu din id-deċiżjoni speċjalment wara li fit-13 ta' Diċembru li għaddha ngħatat il-Midalja għall-Qadi tar-Repubblika għax-xogħol li għamlet bħala referee femminli fejn laħqet l-ogħla livell.

Esther kienet l-ewwel referee femminili li ħadet il-badge tal-FIFA u l-ewwel u l-unika waħda s'issa li rreffjat fil-Premier. L-istaġun li għadda kellha xi problemi meta kellha ħafna kritika meta kienet keċċiet lill-goalkeeper ta' Floriana f'April li għadda u d-deċiżjoni kienet qajmet kontroversja sħiħa. Iżda l-president Norman Darmanin Demajo kien ħass li kellu joħroġ għonqu bi stqarrija favur id-deċiżjoni li kienet ħadet. Kien intqal ukoll li Esther kienet anke ġiet insulentata waqt li kienet f'xi ħanut tixtri. Iżda minn dak in-nhar ma kellha l-ebda problemi oħra.

Esther Azzopardi li tiġi bint l-eks assistent referee tal-FIFA, Ronnie Farrugia rrefjat 65 partita Internazzjonali mill-UEFA Champions League tan-nisa, mill-Euro tan-Nisa u Tazza tad-dinja tan-nisa u rrefjat 'il fuq minn 50 partita fil-Premier. Sadattant aċċettat li tuża l-esperjenza tagħha għal benefiċċju tar-referees lokali u għalhekk se tieħu rwoli ta' osservatur tar-referees u Ambaxxatur tar-referees għar-rekluti nisa fid-dipartiment tar-referees tal-MFA.

John Busuttil attenda is-Seminarju tal-Arċisqof fil-livell sekondarju. Fl-1978 attenda għal kors tal-Method Study organizzat mill-Malta Institute of Management u ġie ċċertifikat fil-Method Time Study. Fl-1987 attenda b’suċċess għal kors fil-Middle Management organizzat mid-dipartiment tal-Management studies fl-Universita ta’ Malta. Għal erba snin sħaħ, 1994, 2000, 2001 u 2004 kien finalist tal-ġurnalist tas-sena fil-BPC awards u fl-2004 ingħata dan l-unur għal 'significant contribution to Professional Journalism' Producer & Presenter ta' diversi programmi fuq NET TV, SMASH TV, PBS u ONE TV. Ipproduċa u ppreżenta programmi radjufoniċi dwar Vjaġġar u Sport u pparteċipa f'diversi programmi televiżivi u radjufoniċi dwar suġġetti varjati. Għal 43 sena ħadem mal-Media Link. U bħalissa jaħdem mal-MediaToday.
Stħarriġ
Segwina fuq Facebook