Intervista Lokali Barranin

Birkirkara jirritornaw għar-rebħ

Qormi          0

Birkirkara    2

Cristian Muscat / 22 ta' Settembru 2014 12:25
Wara li fi tmiem il-ġimgħa li għaddiet Birkirkara sorprendentament sfaw megħluba minn Balzan bl-iskor ta’ 3-2, l-iStripes irritornaw għar-rebh meta għelbu lil Qormi bl-iskor ta’ 2-0. Kienu Qormi li ħolqu l-ewwel azzjoni perikoluża fit-13-il minuta meta l-attakkant Niġerjan, Frank Temile, avvanza fuq il-linja tal-lemin, iżda ġie antiċipat mill-goalkeeper ta’ Bikirkara Justin Haber. Fit-32 minuta Paul Fenech għadda tajjeb lejn Ellinton Morais li ra x-xutt fil-baxx tiegħu jiġi mdawwar f’corner minn Farrugia.

Erba’ minuti biss wara, tentattiv daqqa ta’ ras minn Matheus Bissi ġie salvat mill-goalkeeper ta’ Qormi Matthew Farrugia b’saqajh minn fuq il-linja. 

Fit-tieni taqsima Qormi kienu aħjar mill-ewwel taqsima speċjalment bl-inklużjoni tal-attakant Niġerjan Alfred Effiong iżda kienu Birkirkara li ħolqu l-ewwel periklu f’din it-taqsima eżattament fit-62 minuta meta minn freekick mogħti minn Ellinton Morais, għola tajjeb bir-ras Matheus Bissi li iżda ra t-tentattiv tiegħu jiġi milqugħ tajjeb minn Farrugia. 

Fit-82 minuta Albert Bruce għadda l-ballun lejn Alfred Effiong li ra x-xutt tiegħu jiġi mdawwar f’corner bi bravura mill-goalkeeper internazzjonali, Justin Haber.

Birkirkara marru fil-vantaġġ fit-83 minuta meta Rafeal Ledesma għadda tajjeb lejn Ryan Camenzuli li wara li kkontrolla tajjeb, għeleb għal kollox lil goalkeeper ta’ Qormi Matthew Farrugia, permezz ta’ xutt fil-baxx minn barra l-kaxxa.

L-iStripes irnexxilhom jirdoppjaw l-iskor fit-92 minuta meta Rafael Ledesma li ħa post Shevchenko fis-76 minuta, tefa’ wara l-goalkeeper u captain ta’ Qormi, Matthew Farrugia, permezz ta’ xutt fil-baxx.

Qormi - Farrugia, Bondin, Quatrochi Santos, Chetcuti (Micallef 63’), Pisani, Sammut, Agius, Levniac, Bruce, Viggiani (Effiong 46’), Temile

Birkirkara - Haber, Bissi, Morais, Vukanac, Shevchenko (Ledesma 76’), Mendoza, Fenech, Muscat, Scicluna (Zammit 76’), Borg (Grech 55’), Camenzuli

Referi - Mario Apap

Matheus Bissi

Ġie vvutat bħala l-BOV Plejer tal-Logħba mill-ġurnalisti preżenti

Twieled fid-19 ta’ Marzu 1991 fil-Brażil

Qabel ingħaqad ma’ Birkirkara kien jilgħab ma’ FC Banga Gargzdai

Iddebutta ma’ Birkirkara fil-konfront kontra Sliema Wanderers nhar l-24 ta’ Awwissu 2013

Cristian Antony Muscat huwa ġurnalist sportiv li jispeċjalizza fil-futbol. Ilu f’dan il-qasam għal dawn l-aħħar 5 snin. Kien kummentatur f'diversi logħbiet prinċipali tal-futbol fosthom dawk mill-UEFA Champions League kif ukoll tal-waterpolo, handball u futsal. Għandu għal qalbu ħafna l-isports hekk kif jarah bħala mezz ewlieni li jgħin lill-bniedem biex jiskopri dejjem iktar lilu nnifsu.
Stħarriġ
Segwina fuq Facebook