Ħarsa lejn il-grawnds tat-Tazza tad-Dinja
Fit-Tazza tad-Dinja li se tkun qed tiġi organizzata bejn it-12 ta’ Ġunju u t-13 ta’ Lulju fil-Brażil se jkunu użati tnax-il grawnd differenti li fihom se jkunu qed jintlagħbu l-64 logħba validi mill-istess kompetizzjoni meqjusa bħala l-iktar waħda importanti fil-futbol mondjali. Il-grawnds huma dawn: Estadio do Maracana, Arena Pantanal, Estádio Nacional Mané Garrincha, Arena Fonte Nova, Arena das Dunas, Arena Pernambuco, Arena da Baixada u Estadio Castelao. F’dan l-artiklu se nkunu qed nagħtu ħarsa dettaljata lejn it-tmien grawnds prinċipali.
Estadio do Maracana
Huwa wieħed mill-ikbar grawnds fid-dinja kif ukoll wieħed mill-iktar popolari. Kien jesa’ mal-200,000 spettatur iżda matul is-snin il-kapaċità massima tiegħu ġiet imnaqqsa u llum jesa’ 78,838 spettatur. Ir-rekord ta’ attendenza ġo dan il-grawnd imur lura għas-16 ta’ Lulju tal-1950 fejn dakinhar kien hemm xejn inqas minn 199,854 partitarju jsegwu l-logħba bejn il-Brażil u l-Urugwaj. Se jkollu l-unur uniku li jospita l-logħba finali tat-Tazza tad-Dinja nhar it-13 ta’ Lulju.
Arena Pantanal
Huwa stadium ġdid li se jkun qed jintuża biex jiġu pprattikati fih diversi sport f’Cuiaba. Ġie inawgurat b’mod uffiċjali fis-26 ta’ April u l-iktar li se jkun qed jintuża se jkun għall-futbol. Se jkun jesa’ 42,968 spettatur.
Estádio Nacional Mané Garrincha
Dan huwa stadium li jista’ jiġi użat biex fih jiġu pprattikati diversi sport għalkemm bħalissa l-iktar li jintuża huwa għall-futbol. Huwa jesa’ 72,788 spettatur. Inbena lura fl-1974 u ġie msemmi għall-futboler popolari Brażiljan Garrincha.
Arena Fonte Nova
Huwa rreferut anki bl-isem ta’ Complexo Esportivo Cultural Professor Octávio Mangabeira. Jintuża biss għall-futbol fejn ġie mżanżan fit-Tazza tal-Konfederazzjonijiet fl-2013 u qed jerġa’ jiġi utilizzat matul din it-Tazza tad-Dinja. Jinsab f’Salvador, Bahia u l-iktar li jesa’ huwa 55,000 spettatur.
Arena das Dunas
Huwa stadium li ġie ddisinjat mill-perit ewlieni tal-isport Christopher Lee u li kien ilu jinbena minn Jannar tal-2011 biex jospita logħbiet mit-Tazza tad-Dinja fil-Brażil. Ġie diskritt minn Lee nnifsu bħala l-iktar stadium perfett fl-Amerika ta’ Isfel. Sewa s-somma ta’ 400 miljun Dollaru u jesa’ 45,000 spettatur.
Arena Pernambuco
Huwa stadium ġdid li se jkun qed jintuża mhux biss għall-futbol. Jinsab fiż-żona metropolitana ta’ Recife f’Sao Lourenco da Mata u jesa’ 46,160 spettatur. Is-sid tiegħu huwa l-Gvern ta’ Pernambuco.
Arena da Baixada
Huwa rriferut ukoll bħala Estádio Joaquim Américo Guimarães. Jinsab f’Agua Verde fil-viċinanzi ta’ Curitiba, Parana. Huwa wieħed mill-iktar grawnds antiki li qed jintuża f’din it-Tazza tad-Dinja hekk kif infetaħ lura fl-1914 u huwa l-istadium tat-tim popolari Brażiljan Atletico Paranaense li jmexxi u jopera dan l-imsemmi stadium. Jesa’ 28,413 spettatur.
Estadio Castelao
Huwa rriferut ukoll bħala Estádio Plácido Aderaldo Castelo kif ukoll bħala Gigante da Boa Vista. Dan l-istadium ġie inawgurat fil-11 ta’ Novembru tal-1973 f’Fortaleza f’Ceara u l-iktar li jesa’ huwa 67,037 spettatur. Is-sid tiegħu huwa l-Gvern tal-istat ta’ Ceara u huwa l-grawnd tat-tim Brażiljan Ceara Sporting Club kif ukoll tal-klabb Fortaleza Esporte Clube. L-isem formali tiegħu jonora lil Placido Aderaldo Castelo li serva bħala Gvernatur ta’ Ceara mit-12 ta’ Settembru tal-1966 sal-15 ta’ Marzu tal-1971. Dan il-persuna kien fundamentali biex l-istess stadium seta’ jsir realtà.