Restawr fuq il-monument tal-Assedju...il-fjuri u xemgħat se jkollhom jitilqu

...restawr fuq in-naħa ta' isfel tal-monument, fiċ-ċentru tal-kontroversja minħabba fjuri u xemgħat li jfakkru lil Daphne Caruana Galizia

Albert Gauci Cunningham / 8 ta' Settembru 2018 13:25
Il-monument se jkun irrestawrat
Il-Ministru Owen Bonnici għadu kemm ħabbar, permezz tal-paġna tiegħu ta' Facebook, illi se jibda restawr fuq in-naħa ta' isfel tal-monument tal-Assedju l-Kbir li jinsab quddiem il-Qorti. Dan il-monument kien f'nofs kontroversja minħabba li minn Ottubru tas-sena l-oħra kien sar post fejn  jitħallew fjuri u xemgħat kif ukoll ritratti li jfakkru lil Daphne Caruana Galizia. 

Intant il-grupp Occupy Justice, qabel ma ħabbar ir-restawr il-Ministru, aċċertaw illi kull darba li l-awtoritajiet jneħħu l-fjuri, xemgħat u ritratti se jpoġġuhom lura, sakemm issir il-ġustizzja. 

Dak li kiteb il-Ministru Owen Bonnici
Fil-fatt ħafna mill-protesti kif ukoll mixjiet li saru biex ifakkru l-ħajja u x-xogħol ta' Caruana Galizia laħqu l-qofol quddiem dan il-monument. Dan minħabba li jiġi quddiem il-Qorti, minn fejn mijiet ta' nies esiġu li għandha ssir ġustizzja għal Daphne Caruana Galizia, li nqatlet f'karozza bomba nhar is-16 ta' Ottubru 2017. Naturalment, ħafna nies oħrajn ma qablu xejn mt-tqegħid ta' fjuri u saħansitra kienet saret mozzjoni mill-Kunsillier Laburista tal-Belt Valletta Ray Azzopardi biex dawn ix-xemgħat, fjuri u ritratti jitneħħew. L-argument kien u baqa' illi dan huwa monument nazzjonali ta' għaqda u ma kienx ideoneu li jsir post fejn titfakkar persuna illi ħafna kienu u għadhom jarawha bħala diviżiva. 

Dak li kitbu tal-Occupy Justice ftit qabel tħabbar ir-restawr...
Albert Gauci Cunningham, 32 sena, ġie appuntat Editur tal-gazzetta Illum u tas-sit illum.com.mt f'Ġunju tal-2015. Gauci Cunningham kien ġurnalista mal-Union Print. Gauci Cunningham jispeċjalizza l-aktar fi stejjer analitiċi-politiċi u anke soċjali li l-gazzetta ILLUM issa saret iktar popolari għalihom, kif ukoll fi stejjer relatati ma' politika nazzjonali u internazzjonali. Gauci Cunningham irraporta minn diversi Istituzzjonijiet Ewropej. Għall-qalb Gauci Cunningham hemm kwistjonijiet soċjali, fosthom il-faqar, il-kirjiet u l-ġustizzja soċjali.