Ittri Il-punt Blogs

Opinjoni | Id-dmugħ tal-kukkudrill u l-qtil ta’ Daphne

Carmel Cacopardo jsostni li l-kapaċitajiet investigattivi ta' Caruana Galizia kienu fost l-aqwa fil-ġurnaliżmu Malti

Carmel Cacopardo / 24 t'Ottubru 2017 15:49
Inkitbu numru kbir ta’ artikli dwar il-qtil ta’ Daphne nhar it-Tnejn li għadda, meta l-karozza li kienet qed issuq ġiet sploduta f’elf biċċa. Tfasslu bosta tejoriji dwar l-identità u l-motiv ta’ dawk li ppjanaw u/jew esegwew dan il-qtil. Mhux ħa nżid mal-ispekulazzjoni.

Bħal bosta oħrajn, tul is-snin jiena wkoll kelli l-possibiltà li nsegwi l-kitbiet tagħha. Bosta minnhom sibthom mill-iktar imformattivi. Il-kapaċitajiet investigattivi tagħha kienu fost l-aqwa fil-ġurnaliżmu Malti.

L-argumenti tagħha kienu dejjem qawwija, għalkemm il-preġudizzji tagħha dejjem kienu ċari. Kienet kapaċi talterna bejn artikli investigattivi tal-ogħla livell ma’ oħrajn li jivvilifikaw lil dawk fil-mira tagħha.

L-opinjonijiet politiċi tagħha kienu dejjem ċari u hi dejjem mexxiethom ’il quddiem b’qawwa kbira. Sa Ġunju 2017 injorat il-parti l-kbira tad-dnubiet tal-PN u ffukat bla ħniena fuq dawk tal-PL. Wara Ġunju 2017, kif kien jixirqilhom, poġġiethom flimkien f’qoffa waħda u b’hekk tat iktar kredibilità lil min jgħid li m’hemmx x’tagħżel bejn il-PN u l-PL.

"‘Jidher li jixtieq li ninsew li hu wkoll ta kontibut biex inġemgħu t-turrun libelli fil-konfront tagħha’"
Carmel Cacopardo
Dwar Alternattiva Demokratika kitbet bosta drabi: kritika f’mumenti delikati fejn il-pożizzjoni politika ta’ AD kienet f’kuntrast ma’ dik tal-PN. Drabi oħra, meta dehrilha, għamlet użu mill-fehmiet ta’ Alternattiva Demokratika kif kien jaqbel biex issaħħaħ l-argumenti tagħha.

Il-qtil tagħha hu daqqa ta’ ħarta għal-libertà tal-espressjoni f’Malta.

Kien hemm bosta opportunitajiet oħra fejn kien hemm min jipprova jagħlqiha ħalqa permezz ta’ numru esaġerat ta’ kawżi ta’ libel. Reċentement sar attentat biex permezz ta’ mekkaniżmu legali eżistenti ġew iffriżati l-kontijiet bankarji tagħha bħala garanzija għad-danni li kienu qed jintalbu. Sfortunatament il-Qrati ma rrealizzawx in-natura reali ta’ din l-azzjoni intimidatorja. L-impatt ta’ din l-azzjoni kien imxejjen biss wara li rnexxiet l-inizzjattiva ta’ crowd funding organizzata minn David Thake. B’hekk l-azzjoni intimidatorja tal-Ministru Cardona u l-konsulenti legali tiegħu kważi sfatt fix-xejn.

Adrian Delia, il-Kap tal-Oppożizzjoni, li wkoll kien taħt il-lenti tagħha għal dawn l-aħħar erba’ xhur, kif jidher minn l-aħħar diskors tiegħu, qed ifittex x’vantaġġ politiku jista’ jakkwista l-partit tiegħu minn dan il-qtil. Jidher li jixtieq li ninsew li hu wkoll ta kontibut biex inġemgħu t-turrun libelli fil-konfront tagħha. Li iritirhom iktar kmieni din il-ġimgħa mhu xejn għajr ipokrezija grassa.

"‘Mid-dehra mhux is-surġent tal-Pulizija biss ħass li kellu bżonn jiċċelebra nhar it-Tnejn wara nofsinhar. X’ser jgħidulna dwar il-carcades li saru, anke jekk kienu ftit? Min ser jassumi r-responsabbiltà għalihom?'"
Carmel Cacopardo
Dan hu essenzjalment dak li hemm mistoħbi wara t-tixrid tad-dmugħ tal-kukkudrilli ta’ wħud minn dawk li qed jgħidu li huma maħsudin b’dan il-qtil.

Il-Pulizija bdew l-investigazzjonijiet tagħhom. It-talba li saret għall-għajnuna ta’ esperti barranin hi utli għax tista’ tkun l-assigurazzjoni meħtieġa biex kull indikazzjoni tkun esplorata u investigata. Imma l-investigazzjoni għal ftit ma bdietx bil-banda għax il-Maġistrat Consuelo Scerri Herrera damet ma indunat li hemm ma kienx postha. Il-fatt li damet is-siegħat biex irrealizzat dan juri li uħud mill-membri  tal-ġudikatura għad għandhom ħafna x’jitgħallmu.   

Il-presenza tal-Maġistrat Scerri Herrera fil-Bidnija ħasdet lil kulħadd hekk kif waslet. Ftit wara l-ħasda kibret minħabba l-kummenti fuq Facebook ta’ surġent mit-tim investigattiv tal-Pulizja li ried jiċċelebra l-avvenimenti li kien qed jara. Il-fatt li ġie sospiż u ser jgħaddi passi dixxiplinari mhux biżżejjed.

Għad hemm ħtieġa ta’ spjegazzjoni mingħand il-Kummissarju tal-Pulizja dwar il-għala xi membri tal-Korp għadhom ma rrealizzawx li l-preżenza tagħhom fuq il-media soċjali hi ta’ ħsara għall-kredibilità u l-imparzjalità tagħhom u tal-Korp tal-Pulizija kollu.

Imma mid-dehra mhux is-surġent tal-Pulizija biss ħass li kellu bżonn jiċċelebra nhar it-Tnejn wara nofsinhar. X’ser jgħidulna dwar il-carcades li saru, anke jekk kienu ftit? Min ser jassumi r-responsabbiltà għalihom?

Il-Prim Ministru hu anzjuż biex il-każ jissolva malajr kemm jista’ jkun. Ilkoll għandna l-istess xewqa u iktar ma dan iseħħ malajr, aħjar għal kulħadd. Imma, meta l-każ jingħalaq ikun il-waqt li nstaqsu jekk dan kollu setax ikun evitat. Għax bla dubju seta kien evitat.

Stħarriġ
Segwina fuq Facebook