Politika Kronaka Soċjali Intervisti Zekzik Poodle Għawdex Qrati u Pulizija

Franza rebbieħa mill-ġdid...20 sena wara li Deschamps għolla t-trofew

Il-Franċiżi jerġgħu jirbħu wara r-rebħa tal-1998 meta l-kowċ tal-lum kien 'captain' tat-tim...

Cristian Muscat / 15 ta' Lulju 2018 10:17
It-tim Franċiż jiddomina u jirbaħ it-Tazza tad-Dinja 2018 (NY Times)
Għat-tieni darba it-tim Franċiż reġgħu refgħu t-trofew tat-Tazza tad-Dinja, wara r-rebħa tagħhom fl-1998. Għal Franza din kienet it-tielet finali tat-Tazza tad-Dinja wara li għamlu dan b’suċċess fl-1998 filwaqt li tilfu dik tal-2006 mal-Italja.

Ir-rebħa tal-Franċiżi kienet waħda b'riżultat ta' 4 gowls għat-tim rebbieħ u 2  għall-Kroazja.

Iż-żewġ timijiet kienu ferm konsistenti matul din l-edizzjoni tat-turnew u minbarra li ma sofrew l-ebda telfa, kellhom plejers individwali li għamlu d-differenza kollha. Fuq naħa nsibu lil Kylia0n Mbappe ta’ Franza filwaqt li fuq in-naħa l-oħra hemm Luka Modric tal-Kroazja li kollha kemm huma taw kontribut sabiex tasal din il-ġurnata tant speċjali għalihom.

Franza mill-ewwel bdew bħala favoriti li jiksbu s-suċċess finali minħabba l-esperjenza li għandhom f’kompetizzjonijiet ta’ dan il-livell. Għall-Kroati din kienet  esperjenza unika. 

Proprju 20 sena ilu fi Stade Saint Denis f’Pariġi, il-kowċ preżenti Didier Deschamps għolla t-tazza bħala captain Franċiż u x-xewqa tiegħu li jerġa’ jkun parti mit-tim Franċiż rebbieħ saret realtà.

Les Bleus kellhom wirjiet tajbin f’din il-kompetizzjoni fejn wara li spiċċaw l-ewwel fi grupp Ċ li kien jinkludi l-Awstralja, id-Danimarka u l-Perù għaddew mill-fażi eliminatorja minn fuq l-Arġentina, l-Urugwaj u l-Belġju.

Kif għedna spikka fost kulħadd iż-żagħżugħ ta’ 19-il sena Kylian Mbappe li flimkien ma’ Antoine Griezmann skorjaw tliet gowls kull wieħed f’din l-edizzjoni u xprunaw mhux ftit it-tim Franċiż.

Il-veloċità ta’ Mbappe hija waħda fenomenali u huwa kkunsidrat bħala theddida għal kull difiża avversarja.

Ir-referi ta’ din il-partita kien l-Arġentin Nestor Pitana li, inċidentalment, ikkontrolla wkoll il-logħba tal-ftuħ.

Franza rebbieħa (BloomberG)
Cristian Antony Muscat huwa ġurnalist sportiv li jispeċjalizza fil-futbol. Ilu f’dan il-qasam għal dawn l-aħħar 5 snin. Kien kummentatur f'diversi logħbiet prinċipali tal-futbol fosthom dawk mill-UEFA Champions League kif ukoll tal-waterpolo, handball u futsal. Għandu għal qalbu ħafna l-isports hekk kif jarah bħala mezz ewlieni li jgħin lill-bniedem biex jiskopri dejjem iktar lilu nnifsu.
Stħarriġ
Segwina fuq Facebook