Minn għada jidħlu fis-seħħ tibdiliet ġodda fit-test tal-VRT

Ara l-lista kollha ta' tibdiliet fit-test tal-VRT

Minn għada, l-istazzjonijiet li joffru s-servizz tal-VRT madwar Malta u Għawdex ser jibdew jintroduċu numru ta’ bidliet fit-test tal-VRT, min-nhar l-Erbgħa li ġej. Fi stqarrija il-Ministeru għat-Trasport, Infrastruttura u Proġetti Kapitali spjega l-bidliet il-ġodda.

Malta qed timplimenta il-bidliet fit-test tal-VRT, imsemmija hawn fuq, skont id-Direttiva 2014/45/EU tal-Parlament Ewropew u tal-Kunsill, li hija ntiża biex tiżgura testitijiet tal-VRT ta’ kwalita’ għolja u standardizzatimadwar l-istati membri. Minkejja dan il-prezz tat-test tal-VRT mhux ser jiżdied minħabba dawn it-tibdiliet.

Test tal-VRT wara aċċident serju

Vettura involuta f’aċċident serju trid tagħmel test tal-VRT ad hoc, wara li tissewwa, biex jiġi kkonfermat li l-vettura hija sikura fit-triq u li m’għandhiex impatt negattiv fuq l-ambjent.

Emissjonijiet tad-Diesel

Ser jiżdied l-infurzar fuq dawk il-vetturi li oriġinarjament ġew manifatturati b’Diesel Particulate Filter (DPF) u jinstabu li ġew imbagħbsa.  Din ser tapplika wkoll għal vetturi tal-merkanzija li jużaw Adblue, speċifikament f’każijiet fejn jinstab li d-DPF ġie evitat jew eliminat.  Il-vetturi ser jeħlu mit-test f’każ li jarmu duħħan ta’ kwalunkwe kulur mill-egżost.

Ir-reviżjoni tal-VRT test ser tiżgura li l-apparati li jikkontrollaw l-emissjonijiet ma ġewx imbagħbsa.

Kategorizzazzjoni

Difetti li joħorġu mit-test tal-VRT ser jiġu kategorizzati skond il-gravita` u l-livell ta’ riskju għas-sigurta` fit-triq.  Il-vettura mbagħad tingħata waħda minn dawn l-erba’ riżultati:

  • Għaddiet mit-test – Il-vettura għaddiet mit-test u tilħaq l-istandards minimi meħtieġa.
  • Għaddiet mit-test b’difetti żgħar – Il-vettura għaddiet mit-test għaliex id-difetti li nstabu ma jaffettwawx is-sigurta` fit-triq jew ma jħallux impatt negattiv fuq l-ambjent.  Dawn id-difetti għandhom jissewwew mill-aktar fis possibli.
  • M’għaddietx mit-test minħabba difetti maġġuri – Il-vettura m’għaddietx mit-test tal-VRT minħabba li d-difetti li nstabu jistgħu jaffettwaw is-sigurta` fit-triq, tpoġġi lil min juża t-triq f’riskju jew iħallu impatt ħażin fuq l-ambjent.  Il-vettura għandha tissewwa fi żmien 16-il ġurnata u terġa’ tagħmel it-test tal-VRT.
  • M’għaddietx mit-test minħabba difetti perikolużi – Il-vettura m’għaddietx mit-test tal-VRT minħabba li d-difetti jikkostitwixxu riskju dirett u immedjat fuq is-sigurta` fit-triq jew iħallu impatt serju fuq l-ambjent.  Il-vettura ma tistax tiġi misjuqa sakemm tissewwa u terġa’ tagħmel it-test tal-VRT.

Id-dwal tal-vetturi

Il-VRT test il-ġdid se jaċċerta li l-vetturi kollha li ġew manifatturati minn Settembru 2009 ‘l hawn għandhom reverse lights jaħdmu u għal dawk il-vetturi li ġew manifatturati b’headlight washer, ser jaċċerta li dawn jaħdmu wkoll.  

It-test ser jagħmel ċert li l-vetturi li ġew manifatturati minn Marzu 2018 ‘l hawn għandhom Daytime Running Lights.  Kwalunkwe indikaturi li juru li hemm ħsara fis-sistema tal-vettura, jitqiesu bħala diffett li jimmarka falliment.

Test tal-VRT għal tratturi

Tratturi li jintużaw fit-triq u li għandhom veloċita` massima li taqbeż l-40KM/h issa jridu jagħmlu t-test tal-VRT.

Penalitajiet

Is-sidien tal-vetturi li ma jikkooperawx u ma jsegwux l-istruzzjonijiet tat-test tal-VRT jistgħu jeħlu sa massimu ta’ €500 jekk jinstabu ħatja.  Individwi li huma ssuspettati li bagħbsu Odometer jistgħu jeħlu sa massimu ta’ €200 jekk jinstabu ħatja.

 

More in Socjali