Bouncer ta' 29 sena baqa' miżmum taħt arrest wara li tressaq il-Qorti mixli li kkaġuna feriti gravi lil żagħżugħ Pollakk kmieni l-Ħadd filgħodu f'Paceville.
Ir-raġel ta’ 29 sena li jgħix fil-Qawra deher quddiem il-Maġistrat Charmaine Galea mixli li kkaġuna ġrieħi gravi ż-żagħżugħ, li kien qed jaħdem bħala gwardjan tas-sigurtà mingħajr liċenzja, b'theddid u li kiser il-paċi pubblika.
Il-filmat xokkanti ta' dan l-attakk ixxandar ilbieraħ minn TVM, biż-żagħżugħ jidher jiġi attakkat minn madwar ħames bouncers.
Iż-żagħżugħ jidher fl-art mitluf minn sensih wara li wieħed mill-bouncers jidher jagħtih daqqa ta’ sieq f’rasu.
Huwa qal li Kien jaħdem f’diskoteka f’Paceville u f’bar ieħor f’Buġibba.
Huwa wieġeb mhux ħati tal-akkużi miġjuba kontrih bil-Qorti tordna li jinżamm taħt arrest.
L-Ispettur Joseph Xerri mexxa l-prosekuzzjoni.