Raġel ta’ 41 sena mit-Turkija, residenti l-Marsa nżamm taħt arrest wara li tressaq il-Qorti akkużat li attakka sesswalment tfajla ta’ 16-il sena.
Ir-raġel a li jaħdem fis-settur tal-kostruzzjoni deher quddiem il-Maġistrat Doreen Clarke akkużat li wettaq att sesswali mingħajr kunsens fil-konfront tal-vittma. Huwa ġie akkużat ukoll li attakka t-tfajla u li ġiegħelha tibża' mill-użu ta' vjolenza kontriha.
Il-Qorti semgħet kif l-inċident seħħ f'Raħal Ġdid nhar l-Erbgħa li għadda, meta r-raġel allegatament qabad il-partijiet privati tat-tifla darbtejn u wara ħarab 'l bogħod.
Fil-Qorti l-prosekuzzjoni esibit ċertifikat mediku li juri l-ġrieħi li sofriet it-tfajla flimkien ma’ filmati li ġew elevati mill-kameras tas-sigurtà.
L-akkużat wieġeb mhux ħati għall-akkużi miġjuba kontrih.
Il-ħelsien mill-arrest ma ntalabx f'dan l-istadju u għalhekk ir-raġel se jkun qed jinżamm taħt arrest preventiv.
