Żagħżugħ ta’ 23 sena akkużat bi stupru illum ingħata l-libertà proviżorja wara li kien ilu xahar fil-kustodja tal-Pulizija.
Ir-raġel mill-Maċedonja li jaħdem bħala gwardjan tas-sigurtà kien inżamm taħt arrest wara li ġie akkużat bl-istupru ta’ mara ta' 22 sena f’Awissu li għadda.
Huwa kien ġie arrestat fuq il-Katamaran fi triqtu lejn Sqallija.
Fit-talba tiegħu l-akkużat wieġeb mhux ħati bl-avukat tiegħu Lennox Vella, jgħid li l-akkużi jmorru lura xahar u li l-Pulizija kellhom ħin biżżejjed biex jiġbru l-evidenza neċessarja.
“Il-vittma nnfisha kienet diġà xehdet fl-inkjesta maġisterjali,” argumenta l-avukat.
Fis-sentenza tagħha l-Qorti laqgħet it-talba tad-difiża u ordnat li r-raġel jingħata l-libertà proviżorja fuq depożitu ta’ €3000 u garanzija personali ta’ €5000.
Huwa ġie ordnat ukoll jiffirma ktieb tal-ħelsien mill-arrest tliet darbiet fil-ġimgħa.
