Fil-Qorti dalgħodu ntqal li t-tlett irġiel akkużati bil-qtil ta’ Daphne Caruana Galizia ma kinux assistiti minn avukat meta tteħdulhom kampjuni tad-DNA.
L-Assistent Kummissarju Dennis Theuma qal lill-Maġistrat li huwa kien preżenti fid-Dipartiment tal-Pulizija għall-Investigazzjoni Kriminali meta l-eks Maġistrat Anthony Vella spjega lill-akkużati li se jkunu qed jitteħdulhom kampjuni tad-DNA.
Huwa saħaq li kien Vince Muscat biss li ma aċċettax li jagħti l-kampjun.
Dawn il-kampjuni ntużaw bil-għan li jkunu jistgħu jitqabblu mat-traċċi tad-DNA elevati minn fuq sigarett li kien kruċjali fl-investigazzjoni.
L-Assistant Kummissarju spjega dan hekk kif illum kompliet il-kumpilazzjoni ta’ evidenza kontra Alfred Degiorgio u l-aħwa George u Vince Muscat, akkużati bil-qtil ta’ Daphne Caruana Galizia fis-16 ta’ Ottubru tal-2017.
Mistoqsi mill-Avukat tad-Difiża William Cuschieri jekk l-akkużati kinux infurmati dwar l-implikazzjonijiet u r-raġunijiet għalfejn se jittieħdu l-kampjuni, l-Assistant Kummissarju qal li hu ma kienx hemm il-ħin kollu u għalhekk ma setax iwieġeb.
“Tajjeb, tajjeb, ma tiftakarx,” qal Alfred Degiorgio b’daħka fuq fommu.
“Ħarist id-dritt tagħhom li jkollhom assistenza legali f’dak il-mument?” staqsa l-avukat. “Ma naħsibx, le,” wieġeb Theuma.
Xehed ukoll rappreżentant tal-Europol li reġa’ ntalab jiġi Malta biex jikkoreġi rapport li ssottometta wara li dan kien jinkludi numru nieqes fl-identifikazzjoni tal-bomba.
Il-każ ikomplu fit-3 ta’ Mejju.
