Każ Liam Debono | Joe Ellis mitlub jispjega artiklu li kiteb fuq l-ILLUM
Franco Debono qed jisħaq li Joe Ellis iddikjara lil Liam Debono ħati qabel intemm il-każ
More in Qrati u Pulizija
Franco Debono qed jisħaq li Joe Ellis iddikjara lil Liam Debono ħati qabel intemm il-każ
Il-Qorti ordnat lill-opinjonista tal-gazzetta ILLUM, Joe Ellis, biex jispjega dak li kiteb ilbieraħ fuq il-gazzetta fejn fost oħrajn ikkritika d-deċiżjoni tal-Qorti li twaqqaf milli tiġi mxandra l-intervista tal-programm Xarabank ma’ Liam Debono.
Waqt li dalgħodu kompliet il-kumpilazzjoni tal-evidenza kontra ż-żagħżugħ, akkużat bl-attentat tal-qtil tal-Kuntistabbli Simon Schembri, l-avukat tal-akkużat, Franco Debono, wera fil-Qorti l-opinjoni tal-avukat Joe Ellis u saħaq li din l-opinjoni tiġġudika liż-żagħżugħ ħati.
Il-Maġistrat Joe Mifsud, li qed jisma’ l-każ, wara li qara l-opinjoni, ordna li din tittieħed għand l-Avukat Ġenerali u anke talab lil Joe Ellis biex fi żmien 24 siegħa jwieġeb għal dak li qed tgħid id-Difiża.
Qal ukoll li ġaladarba l-opinjoni qed tirreferi wkoll għad-deċiżjoni tal-Qorti li twaqqaf l-intervista, il-każ għandu jittieħed ukoll quddiem il-Kummissjoni għall-Amministrazzjoni tal-Ġustizzja biex “tinvestiga u tiddeċiedi kif neċċessarju.”
‘Ħareġ quddiem l-intervista l-istess kif ħareġ quddiem il-karozza’
Intant, waqt l-istess seduta, l-Avukat Debono, li mas-sit illum.com.mt iddefenda l-intervista kontroversjali, talab li Simon Schembri biex jerġa’ jitla’ jixhed u akkużah li ħareġ quddiem din l-intervista l-istess kif ħareġ quddiem il-karozza tal-akkużat dakinhar tal-inċident li ħallih jissielet għal ħajtu.
Franco Debono qal li Schembri għandu jispjega għalfejn għamel ir-rikors biex titwaqqaf l-intervista.
“Jekk niġu għal ġuri, din se tkun l-ewwel ħaġa li se nitlob lill-ġurati biex jaraw. Nirringrazjak li ressaqt dan ir-rikors,” saħaq Debono. “F’din l-awla saret referenza aktar minn darba għall-karattru ta’ Liam Debono, li qed jidher qisu monstru. Issa għandna ċ-ċans li nieħdu X-ray tal-karattru ta’ Schembri.”
“Jiena nista’ nitkellem, iżda l-mument li int tipprova titkellem se nagħlaqlek ħalqek. Dan hu Simon Schembri,” saħaq Franco Debono.
Min-naħa tiegħu l-Maġistrat Mifsud fakkar lill-Avukat Debono li fil-Qorti, l-akkużat għandu dritt ma jitkellimx tul il-proċeduri kollha.
“Jista’ jkollna sitwazzjoni fejn l-akkużat jibqa’ silenzjuż fil-Qorti imbagħad imur fuq il-midja jagħti l-opinjoni tiegħu?,” staqsa l-Maġistrat.