'Kienet qisha xena minn film tal-biża'' - Pulizija jirrakkonta dak li sab f'Ħal Luqa
- L-akkużat kien jaf li Schembri kien maqbud taħt il-karozza u serrep biex jaqilgħu
- Il-vittma mbeżaq minn taħt il-karozza wara li tkaxkar 400 metru.
minn Yendrick Cioffi
Dalgħodu kompliet il-kumpilazzjoni tal-evidenza kontra ż-żagħżugħ ta’ 17-il sena akkużat li pprova joqtol lill-kuntistabbli Simon Schembri.
Illum taw ix-xhieda tagħhom it-tabib tal-emerġenza Michael Spiteri li spjega fil-Qorti l-ġrieħi gravi li ġarrab Schembri li għadu sal-lum rikoverat fit-Taqsima tal-Kura Intensiva tal-Isptar Mater Dei u anke għadd ta' uffiċjali tal-Pulizija.
Fil-Qorti nstema’ kif l-akkużat kien liebes ilbies protettiv li xtara hu stess, xi ħaġa li ma tantx niżlet tajjeb mal-Maġistrat Joe Mifsud.
“Il-Pulizija għandhom ikollhom uniformi li toffrilhom protezzjoni first class,” saħaq il-Maġistrat. “Għaddu dan il-messaġġ,” appella lill-pulizija li telgħu jixhdu.
'Mixħut għal tulu fl-art...ħafna demm'
Michael Schembri, li ilu għal dawn l-aħħar 20 sena jaħdem bħala tabib tal-emerġenza spjega kif malli wasal fuq il-post tal-inċident, Simon Schembri kien mitfugħ wiċċu mal-art, wiċċu 'l fuq, b'ħafna demm mifrux fit-triq.
Saħaq kif il-kuntistabbli kien tilef ħafna demm u ma setax jieħu nifs sewwa minħabba l-ġrieħi li ġarrab f’sidru.
Fost ħafna ġrieħi oħra, il-kuntistabbli ġarrab ġrieħi gravi fil-kustilji li ġeneralment iwasslu għall-mewt, kompla jispjega t-tabib waqt li ddeskriva l-ġrieħi bħala gravi ħafna.
“Jekk mhux l-agħar, żgur li fost l-agħar tliet każijiet li ltqajt magħhom f’20 sena karriera,” qal mit-tabib.
'Il-ġilda ta' idu kienet kważi spiċċat'
Kompla jispjega li idu l-leminija kellha tinqata’ barra minħabba l-ġrieħi gravi u l-ħruq li ġarrab il-vittma. “Il-ġilda kienet kważi spiċċat għal kollox,” saħaq it-tabib.
Rajt nies jibku għax tajru qattusa jew laqtu mera. Dan kien qisu għadu kemm ħa l-kolazzjon L-Ispettur Pierreguido Saliba
“Kieku ma ngħatax trattament immedjatament, kieku llum mejjet,” saħaq it-tabib.
'Qatlu Pulizija'...tifla li kienet fuq l-istage iċċempel lill-Pulizija
Xehed ukoll l-Ispettur Fabian Fleri li spjega kif l-akkużat kien inqabad isuq mingħajr liċenzja erbat ijiem qabel l-inċident.
Spjega kif kienet tifla li kienet fuq l-istage ta’ Tal-Linja li ċemplet lill-Pulizija u qaltilhom “qatlu uffiċjal.”
Jidher li l-akkużat twaqqaf għax ma kienx liebes is-seatbelt u spjega wkoll kif il-karozza kellha pjanċi ta’ vettura oħra li kienet skrepjata
Tkaxkar 400 metru u mbeżaq meta l-akkużat tilef il-kontroll
L-Ispettur spjega pass pass kif ġara l-inċident. Schembri waqqaf liż-żagħżugħ, iżda dan wara ftit tal-ħin qabad isuq, laqat lill-pulizija, ħabat mal-bonnet u wara 15-il metru żelaq għal taħt il-karozza.
Kompla jgħid kif tkaxkar għal 400 metru qabel mal-akkużat tilef il-kontroll u l-vittma “imbeżaq” minn taħt il-karozza. Kien hawn li l-karozza għaddiet minn fuqu.
L-akkużat jidher jirritorna, jieqaf ftit u jirriversja t-triq kollha
L-inċident inqabad fuq il-kameras tas-CCTV, spjega l-ispettur. F’dawn il-filmati, l-akkużat jidher jirritorna, jieqaf għal ftit, imbagħad jirriversja t-triq kollha.
Kien hawn li l-pulizija tar-RIU lemħu lill-akkużat u saqu warajh.
Ħabat ma ħajt, ħareġ mill-karozza u telaq jiġri
Trakk izerta kien qed jimblokka t-triq u l-akkużat pprova jdur fuq il-handbrake iżda ħabat ma’ ħajt.
Huwa ħareġ mill-karozza u beda jiġri sakemm inqabad mill-Pulizija.
X'instab fil-karozza?
Fil-karozza nstabu sikkina żgħira u crusher li tintuża fil-preparazzjoni tal-kannabis.
L-akkużat qal lill-Pulizija li kien xtara l-pjanċi għal €10 mingħand xi ħadd li kien seraqhom.
L-akkużat ma juri l-ebda rimors...kien jaf li Schembri kien taħt il-karozza
L-Ispettur Pierreguido Saliba spjega kif l-akkużat kien jaf li Simon Schembri kien maqbud taħt il-karozza u beda jserrep apposta biex jaqilgħu.
Minkejja dan saħaq li għall-akkużat kien qisu ma ġara xejn.
"Rajt nies jibku għax tajru qattusa jew laqtu mera. Dan kien qisu għadu kemm ħa l-kolazzjon," qal l-Ispettur.
"Xena minn film tal-biża'"
Is-Surġent tal-Pulizija Jonathan Bordieri wkoll iddeskriva dak li ra malli wasal fuq il-post tal-inċident u spjega kif il-vittma kien konxju u minkejja l-uġigħ irnexxielu jkellmu.
Kuntistabbli ieħor li kien preżenti kważi nfaqa’ jibki meta beda jirrakonta dak li ra quddiem għajnejh. Saħaq li mhux faċli tara kollega tiegħek f’dik il-kundizzjoni u qal li beda jipprova jkellmu bil-għan li ma jintilfx minn sensih.
Għandi raġel li qed jissieled għal ħajtu fl-isptar. Araw li jingħata l-għajnuna kollha Il-Maġistrat Joe Mifsud
Il-kuntistabbli Etienne Farrugia ddeskriva dak li ra bħala “xena minn film tal-biża’.”
“Rajtu mal-art,” qal il-kuntistabbli. “Rajt l-għadma,” kompla jirrakkonta meta beda jiddeskrivi l-ġrieħi f’id il-kollega tiegħu. “Ħsibt li miet.”
Il-Maġistrat jappella biex Schembri jingħata kull ma għandu bżonn
Fi tmiem is-smigħ, il-Maġistrat appella biex li Simon Schembri jingħata dak kollu li għandu bżonn.
"Għandi raġel li qed jissieled għal ħajtu fl-isptar. Araw li jingħata l-għajnuna kollha. Irrid li l-Pulizija jkunu siguri waqt il-qadi ta' dmirhom u ma jibżgħu minn ħadd."
Intant, l-Avukat Franco Debono talab li jkun appuntat uffiċjal tal-probation biex jassisti lill-akkużat, anke jekk qed jinżamm il-ħabs.
Il-Qorti laqgħet din it-talba.