Waqt li kien qed jagħti x-xhieda tiegħu aktar kmieni llum, il-Kap Eżekuttiv tal-PBS Anton Attard qal li hu qatt ma’ sema’ lil ħadd jgħid li Silvio Scerri ried jeħles minn Norman Vella.
Attard kien qed jixhed fil-każ ta’ Norman Vella, eks-preżentatur tal-programm TVHEMM li kien jixxandar fuq l-istazzjon nazzjonali. Fil-każ Vella qed jallega li saret diskriminazzjoni politika kontriħ meta fl-aħħar elezzjoni ġenerali l-Partit Laburista rebaħ l-elezzjoni u hu kien trasferit lura lejn ix-xogħol prinċipali tiegħu, dak ta’ Uffiċjal tal-Immigrazzjoni fl-Ajruport.
Il-Kap Eżekuttiv Anton Attard qal li hu jiddiskuti l-programmi tal-PBS u l-kontenut tagħhom ma’ Silvio Scerri għax ‘jifhem fix-xandir’ għalkemm qatt ma saru dawn it-tip ta’ konsulti qabel il-bidla fil-gvern.
Attard qal li minn meta waqaf il-programm ta’ Vella il-PBS naqqas fl-udjenzi tiegħu fil-faxxa tal-ħin li fiha kien jixxandar il-programm TVHEMM filwaqt li ddeskriva lil Vella bħala producer u preżentatur kompetenti f’xogħolu.
Il-każ mistenni jkompli f’Jannar.
