Il-Membru Parlametari Ewropew Alex Agius Saliba fetħilha kontra programm tat-teleshopping wara li l-persuna li kienet qed tippreżentah qalet illi maskri tista' terġa tilbishom, meta dawn huma fil-fatt huma disposable. Agius Saliba fakkar illi din hija informazzjoni qarrieqa u kiteb lill-Awtorità tax-Xandir kif ukoll lil-MCCAA - l-Awtorità li tipproteġi lill-Konsumatur - sabiex dan it-teleshopping, li jixxandar fuq Smash TV, jitwaqqaf b'mod immedjat.
Iżda mhix biss l-informazzjoni skorretta li dejqet lill-Agius Saliba bil-kbir imma wkoll il-prezz tal-istess maskri.
"Sa ftit ġimgħat ilu dawn kienu qed jinbiegħu bi ftit ċenteżmi, fil-fatt jinbiegħu f'pakketti ta' ħamsinijiet u mijiet. Issa qed jinbiegħu minn fuq dan il-programm b'bejn €2.40 għal €3.40 kull waħda."
"Dan huwa serq fil-wiċċ" saħaq l-MEP Laburista."Mhux talli dan it-teleshopping tal-imbarazz qed jabbuża bil-prezzijiet, talli qed jipperikola ħajjet in-nies," saħaq Alex Agius Saliba.