Xejn inqas minn 81 persuna ngħataw multa ta’ €100 waqt ir-rondi li qed tagħmel il-Pulizija biex tassigura li ma jkunx hemm ġemgħat ta’ aktar minn tliet persuni f’postijiet pubbliċi u dan skont l-avviż legali li nħareġ mill-Gvern biex tkun ikkontrollata l-imxija tal-Covid-19.
Apparti dawn, żewġ stabbilimenti nqabdu jiksru r-regolamenti biex jibqgħu magħluqa biex titrażżan l-imxija tal-Coronavirus.
Wieħed minn dawn kien kiosk f’Baħar iċ-Ċagħaq li kien qed iservi l-birra u ħanut tax-xorb fil-Ħamrun li nqabad bi klijenti jixorbu u jisimgħu l-mużika.
Is-sidien ingħataw multa ta’ €3,000 kull wieħed, bil-ħanut tax-xorb fil-Ħamrun jingħata wkoll avviż ta’ infuzar.
Fl-aħħar 24 siegħa saru 1,030 spezzjoni fil-gżejjer Maltin. Tista’ tirrapporta lil min jabbuża fuq 21692447.
Intant għal darb’oħra, wara 478 spezzjoni li saru fl-aħħar 24 siegħa, ħadd ma nqabad jikser il-kwarantina obbligatorja