Is-Supretendent tas-Saħħa Pubblikla Charmaine Gauci ħabbret li, fl-aħħar 24 siegħa, disa' persuni oħra rriżultaw pożittiv għall-coronavirus u għall-ewwel darba, Malta, kellha tliet każi ta' trasmissjoni lokali, jiġifieri tliet pazjenti li l-virus ħaduh mhux minn barra minn Malta, għax ma sifrux, iżda minn persuni oħra infettati li kienu f'Malta.
It-tliet każi trasmessi lokalment jinvolvu tliet ħaddiema tas-saħħa. Dawn it-tliet pazjenti kienu diġà ġew identifikati waqt l-assessjar li qed isir mill-awtoritajiet tas-saħħa, hekk kif kienu f'kuntatt dirett ma' persuni oħra li fl-aħħar jiem irriżulta li kellhom il-Covid-19.
Għalhekk, dawn it-tliet ħaddiema tas-saħħa kienu jinsabu fi kwarantina meta ħarġulhom is-sintomi.
Waħda mill-ħaddiema kienet qiegħda Għawdex
Is-Supretendent spjegat kif waħda minn dawn il-pazjenti kienet tinsab f'Għawdex, iżda ma ħaditx il-Covid-19 minn Għawdex. Din il-pazjenta tniżżlet Malta biex tinżamm Mater Dei.
Fil-fatt, aktar tard fi stqarrija, il-Ministeru għal Għawdex spjega kif din il-pazjenta ttieħdet Malta f’ambulanza fi vjaġġ tal-Gozo Channel li sar apposta għal eventwalità bħal din. Dan ifisser li apparti l-ambulanza, fuq il-vapur ta' Għawdex, ma kien hemm l-ebda vettura oħra.
Charmaine Gauci spjegat li sa issa, il-każi kollha f’Malta kienu stabbli, tant li dawn setgħu jinżammu f’iżolament id-dar u mhux l-isptar, anke jekk sa issa kollha kemm huma ġew rikoverati f’Mater Dei.
Fakkret li mit-30 pazjent li rriżultaw pożittiv, tnejn minnhom fiequ.
Il-każijiet impurtati
- Maltija ta’ 56 sena
- Marret l-Ingilterra bejn il-5 u t-13 ta’ Marzu
- Fil-15 ta’ Marzu kellha l-ewwel sintomi: deni, sogħla u uġigħ ta’ ras
- Ma taħdimx.
- Tgħix mar-raġel u qiegħed fi kwarantina
- Raġel 34 sena
- Dan kien vaganza ma' pazjent ieħor (pożittiv fil-ġranet li għaddew) li kien mar Barċellona
- Marru fis-6 ta’ Marzu u rritornaw fl-10 ta’ Marzu
- Fl-14 ta’ Marzu kellu l-ewwel sintomi: sogħla u ftit deni u sar it-test
- Jaħdem f’kumpanija privata u kien mar ftit ix-xogħol
- Għaddej l-assessjar fil-kumpanija biex ikun magħruf x'kuntatt kellu u jekk hemm persuni f'riskju
- Żagħżugħ ta’ 15-il sena
- Kien Malta ma' grupp ta’ ħbieb.
- Meta kien sejjer lura Spanja, waqt li kien l-ajruport, ħassu ma jiflaħx
- Ġew iżolati fil-klinika tal-ajruport
- Iż-żagħżugħ ta' 15-il sena rriżulta pożittiv
- Inżammew hawn Malta u sħabu tpoġġew fi kwarantina
- Taljana ta’ 49 sena
- Tgħix u taħdem Malta
- Ma sifritx, iżda r-raġel tagħha siefer Ruma u Montenegro bejn l-4 u l-5 ta’ Marzu
- Kellha s-sintomi fil-15 ta’ Marzu
- Is-suspett huwa li ttieħdet minn sintomi ħfief li kellu r-raġel
- Ir-raġel tagħha ma kienx mar għax-xogħol għax sema mill-pariri tal-awtoritajiet
- Ingliż ta’ 32 sena
- Resident hawn Malta
- Ġie fit-13 ta’ Marzu u fl-14 ta’ Marzu ħarġulu s-sintomi
- Sema mill-pariri u kien fi kwarantina
- Il-mara tiegħu tinsab fi kwarantina wkoll
- Sar ukoll kuntatt mal-passiġġiera li kienu bilqiegħda viċin tiegħu fuq l-ajruplan
- Żagħżugħ ta’ 19-il sena
- Ukoll relatat ma’ pazjent ieħor li fl-aħħar jiem irriżulta pożittiv għall-coronavirus
- Kienu marru Dublin.
- Siefer bejn il-5 u l-10 ta’ Marzu
- Kien sar kuntatt miegħu meta sieħbu kien irriżulta pożittiv
- Għalhekk ma kienx mar Università
- Iżda mar ftit ħin ix-xogħol u għalhekk qed isir kuntatt mal-kumpanija biex ikun magħruf x'kuntatti kellu
Trasmissjoni lokali
Żewġ ħaddiema tas-saħħa li ttieħdu minn ħaddiema oħra
Charmaine Gauci fakkret fil-każ tal-ħaddiema tas-settur tas-saħħa li kienet irriżultat pożittiv fil-ġranet li għaddew. Fakkret li meta kien sar l-assessjar kien irriżulta li din kellha kuntatt ma’ żewġ persuni oħra li jaħdmu magħha. Dawn kienu tpoġġew mill-ewwel fi kwarantina u għalhekk ma kinux marru għax-xogħol. It-tnejn li huma ħarġulhom is-sintomi u sarulhom it-testijiet. Iż-żewġ pazjenti huma:
- Raġel ta’ 36 sena
- Dan ħarġulu s-sintomi fl-14 ta’ Marzu
- Peress li fil-ġranet ta' qabel kien mar ix-xogħol sar l-assessjar mal-kollegi tiegħu
- Ir-riskju għall-pazjenti huwa wieħed minimu
- Tfajla ta’ 23 sena
- Kellha kuntatt dirett mal-pazjenta (pożittiva għall-coronavirus fil-ġranet li għaddew)
- Fit-13 ta’ Marzu ħarġulha s-sintomi
- Kienet fi kwarantina
- Għaddej l-assessjar biex ikun magħruf x’kuntatt kellha mal-kollegi
- Mill-assessjar ġie stabbilit li r-riskju għall-pazjenti huwa minimu
Ħaddiema oħra tas-saħħa
It-tielet każ ta’ trasmissjoni lokali tal-Covid-19, ukoll jinvolvi ħaddiema tas-saħħa li ħarġulha s-sintomi fl-14 ta’ Marzu, fejn kellha deni u anke flissjoni. Din ma kinitx imsiefra. Is-sorsi setgħu kienu tnejn:
- Tgħix ma’ persuna oħra, Taljan, li kien imsiefer
- Kellha wkoll kuntatt ma’ ħaddiem ieħor tas-saħħa f’Malta li rriżulta pożittiv għall-Covid-19
Dawk kollha li jaħdmu magħha jinsabu fi kwarantina.
